力壓祖奧柏度 尼馬入選巴西大軍
巴西國家隊公布今夏世盃決賽周26人名單，最受注目的是名將尼馬最終力壓車路士前鋒祖奧柏度入選。巴西足總安排了盛大儀式，現場回顧了球隊5次奪冠歷程，傳遞出球隊衝擊第6冠的信心。當尼馬的名字被主帥安察洛堤讀出後，全場爆發出雷鳴般的歡呼聲。
尼馬是巴西隊出戰2014、18與22年世界盃的主力，但在2023年在對烏拉圭比賽受傷後，便再沒有為國家隊上陣。為了爭取出戰今夏世界盃，尼馬今年1月重返母會山度士希望努力操起狀態，最終獲得青睞。安帥說：「我哋全年都評估緊尼馬，佢喺今屆世界盃將扮演重要角色！」
車路士前鋒祖奧柏度的落選頗為令人意外，安帥對此回應指：「我為落選嘅球員感到難過，競爭非常激烈，或者呢份唔係完美名單，但完美嘅球隊唔會贏得世界盃，最終奪冠嘅，會係一支擁有韌性嘅球隊。」談及能否6度奪冠，安帥回應：「我唔係魔術師，但我喺呢個行業做咗40年，相信呢支隊伍能夠同世上最優秀嘅球隊競爭。」
