離巢經深思熟慮 胡定欣專心音樂路
44歲的胡定欣前日（4日）立春在社交平台正式宣布離巢TVB，結束22年合作關係。胡定欣昨日（5日）現身銅鑼灣，出席胡曦文旗下奢華珠寶及時尚品牌Crisathena新店開張。她接受訪問時表示：「上年年尾約滿嘅時間已做咗呢個決定，當然係經過深思熟慮啦，公司亦好尊重我嘅決定。」她稱目前想專心發展歌唱事業。
胡定欣表示，日後要重新認識自己，在工作上凡事都要親力親為：「當然我都有去諮詢其他朋友，跟住我覺得自己都學習緊，雖然我都係一個藝人身份，但係其實你想點應該係你自己最清楚，所以我覺得喺呢啲細節上面，你自己都清楚埋嘅時候，你就真係可以好好咁樣管理你自己，同埋知道自己想要嘅嘢。」她承認未來發展自由度更大，可以與不同人合作，「領域都唔同咗，因為過去咁多年，自己係以拍劇為主嘛，合作就限於演員，咁我最近都想擺啲心機去做歌或者係做我自己嘅音樂會。」
