阿仙奴5連勝 愈帶愈遠
賴斯英超首度起孖
英超一哥阿仙奴，昨晨憑傷癒復出的中場迪格蘭賴斯梅開二度，作客以3:2力克般尼茅夫，聯賽5連勝，已逐步拋離緊隨其後的曼城及阿士東維拉。阿仙奴今季聯賽20戰已贏15場，值得一提的是迪格蘭賴斯職業生涯296場英超，今仗才是首次單場梅開二度。
開賽10分鐘，阿仙奴防線失誤，中堅加比爾馬加希斯在後場橫傳，被對手法蘭斯高艾雲尼臣截到，並單刀射入為般尼茅夫先開紀錄。阿仙奴落後下隨即反攻，16分鐘馬度基在右路突破後傳中，禁區一輪混戰，軒卡派爾、加比爾馬天尼利先後起腳均省中對手，最後由加比爾馬加希斯把皮球送入網，將功贖罪追成1:1平手。下半場成為迪格蘭賴斯表演時間，這名中場先接應馬田奧迪加特橫傳，在禁區頂起腳得手助阿仙奴反超前，之後再接應布卡約沙卡傳中射入。般尼茅夫之後由高洛比遠射得手追至2:3，但無阻阿仙奴在聯賽連贏5場。
迪格蘭賴斯因傷缺陣上場對阿士東維拉，今場復出後就馬上成為贏波功臣，阿仙奴主帥阿迪達認為這是賴斯努力付出後獲得的回報：「賴斯為咗復出做足準備，今晚得到回報，佢不斷為球隊貢獻，仲持續提升個人能力，我仲未睇到極限！」另外，加比爾馬加希斯在10分鐘因一次自殺式回傳累球隊失守，但其後迅速建功扳平比數，阿迪達稱要在犯錯後迅速調整，絕不容易：「我好鍾意加比爾性格，克服嚴重犯錯之後嘅有力回應，令人難以置信！最後贏波亦反映咗我哋有好大成長。」此外，蘇比文迪今仗作出78次傳球，其中70次成功傳予隊友，亦為全場之冠，迪格蘭賴斯對這位中場拍檔讚不絕口：「佢係最強壯球員，而且頭腦靈活，令球隊運轉更加暢順。」
狼隊大炒韋斯咸開齋
同日護級大戰，榜尾狼隊踢到今季第20輪終於開齋，憑韓國鋒將黃喜燦一射一傳，主場3:0輕取韋斯咸。黃喜燦賽後說：「大家都見到新帥艾華斯嘅工作，佢嘅戰術講解好清晰，以佢嚟到咁短時間，真係好掂！」至於9月才接手執教韋斯咸的紐奴，在球隊表現每況愈下，有可能繼季初森林後，季內第2次被炒。
