數據強勁 兩場大盤做重心
德甲上周開鑼，已經上演連場進攻風暴，今輪亦精選兩場有強勁數據支持會開入球騷比賽，值得優先重視。賀芬咸明晚主場對法蘭克福，兩支黑柴上周重點推介球隊，都順利贏波贏盤，今輪雙方都正士氣如虹，同樣有充足信心搶攻爭勝！值得留意的是兩軍在近9次於德甲對賽，每場雙方都有波入，而且全部總入球最少的有4個，數據極度硬淨！上季同樣在第2輪交手，法蘭克福主場贏3:1。賀芬咸上輪爆冷贏利華古遜，但防線新領袖町田浩樹重傷要長抖，更添今仗大盤可能。
另一場為周日晚多蒙特主場對柏林聯（NOW 639台周日11:30pm直播），雙方近8次碰頭共產生36個入球，多蒙特近兩季主場分別贏4:2及6:0，入球停不了！柏林聯首仗主場爆冷贏史特加固然士氣盛，多蒙特作客和聖保利更具參考價值。要知道守強攻弱的聖保利是德甲「頭號細盤王」，上季34場聯賽有24場總入球在兩球或以下，首輪聯賽前一周的德國盃，與丁組諾德斯泰特經過120分鐘惡戰也踢成0:0平手。遇上多蒙特竟然開出3:3，足見多蒙特防線問題嚴重，季初可以重點追大盤。
