楊頌熹 沈曉榆 放眼世錦賽
武術隊奪金後凱旋
香港武術隊在成都世界運動會勇奪兩面金牌，分別是男子太極拳太極劍全能項目的楊頌熹、及女子長拳劍術槍術全能沈曉榆，昨天返港時兩人表示不會自滿於這面金牌，已將下一目標放在本月尾的世錦賽。
兩名武術代表昨日由成都返港，楊頌熹回想獲勝一刻，笑言當時只是沉醉於自己表演：「完成比賽後覺得已經做到自己理想，嗰一刻完全冇留意分數，只係享受現場觀眾嘅歡呼聲，敬禮落台之後至知道總分排第一。」楊頌熹在世運會表現出色，兩個項目均發揮得行雲流水，超越上屆摘銅成績，他認為心態方面變得更成熟，並透露致勝關鍵：「喺專業角度嚟講，就係沉醉於音樂。之前我係抱住快啲打完、跳躍難度唔好失手，不過今次每一個動作表達，同音樂完全配合，唔再分心去諗驚住失手。」楊坦言不會滿足和執着於這項成就：「呢一刻，呢個比賽我係世界冠軍，但喺其他比賽就唔一定係，其他運動員都會進步，所以我可能無法長期霸佔冠軍地位，但我會永遠努力挑戰呢個世界第一位置。」
沈曉榆獲朋友到場獻上公仔祝賀，讓她大為感動。談到世運會金牌的意義，指增加動作難度應戰對她意義重大：「由去年打完世運資格賽，就一直期待今年呢個真正比賽，用咗新難度，喺咁高壓嘅情況下，可以穩定咁完成3套新難度動作，係對自己之前訓練嘅肯定！」沈曉榆早年曾斷過韌帶，深深體會運動員生涯有限，讓她更珍惜每一次訓練和比賽機會：「做過手術體會到一斷腳就咩都做唔到，就會特別珍惜運動員擁有嘅時間，將每一場比賽都當作最後比賽，就會更加享受。」
兩人不約而同指會收拾心情，備戰月底在巴西舉行的世錦賽，希望可以再下一城。楊說：「會放低呢面金牌，唔會執着於成績，好好準備下個比賽。」
何子樂闖壁球女單四強
此外，香港壁球一姐何子樂於昨日女單壁球八強戰，以直落3局11:3、11:7、11:5輕取瑞士球手Cindy Merlo，順利晉級準決賽。另一港壁女單球手李嘉兒，則以局數2：3不敵西班牙球手Marta Dominguez，止步八強。
