杜德偉拒「滑啞」 震撼回歸紅館
新歌寓意衝破黑暗 尋找光明
為慶祝出道香港樂壇40年，杜德偉（Alex）宣布相隔10年再在紅館開騷。他坦言至今仍對音樂很有熱誠，堅拒停滯不前，希望每次演出都帶給觀眾震撼效果，故特別創作新歌《黑日》，帶出「衝破黑暗，尋找光明」的理念，用音樂灌輸正能量。
杜德偉將於10月18、19日再踏紅館，舉行兩場香港限定版「杜德偉Get Up世界巡迴演唱會香港站」。為了配合香港站舞台表演，近日他推出一首具80年代Feel的新歌《黑日》現場版，屆時在舞台上與大家分享衝破黑日的勁度演出。
進行連串體能訓練
Alex坦言紅館是香港歌手的指標性場地，所以每次在紅館開騷都感覺榮幸：「我上一次喺紅館舉行演唱會係10年前，加上今年係我入行40周年，具有雙重意義，所以已經同我製作團隊構思不一樣感覺嘅舞台演出。」他亦進行連串體能訓練，勢以最佳狀態見粉絲。
提到新歌《黑日》現場版，Alex表示創作此曲的背後原因：「其實由我出道80年代至今，我一直對音樂有無限空間，但到咗現階段有一種停滯不前嘅感覺，所以《黑日》嘅創作初衷係想黑暗中找尋光明，呢首歌有一個正面意義，我對呢首歌嘅音樂性尤其喜歡，因為有一種返番80年代嘅感覺。」
《黑日》現場版拍攝概念，是Alex一直以來想實踐的內容畫面。他隨着80年代的勁度音樂，配以型爆造型和雷射鏡視覺效果，極具震撼力，他滿意說：「其實呢首歌喺舊年加入巡唱歌單，今次我將總綵排片段同演唱會現場演出片段混剪，成為Live版，特意回饋歌迷。綵排時喺冇觀眾情況下拍攝，冇壓力好輕鬆，最後再360度將鏡頭轉向之前台上Live演出嘅畫面，喺台下觀眾一片歡呼聲下，成功結合咗呢首不一樣、有現場感覺嘅MV。」
