伍允龍唔急結婚 想情侶檔搵銀
認愛後首次拖女友出席公開場合
自從與鍾嘉欣分手後，Dry足10年的伍允龍今年5月底宣布與「宅男女神」李蔓瑩拍拖。前晚兩人認愛後首次一齊出席公開活動，伍允龍大讚女友性格冇得彈，但暫時未有計劃結婚。他笑言現時拍拖不用「收收埋埋」，樂意與女友情侶檔搵真銀。
古天樂、伍允龍與女友李蔓瑩、《中年好聲音》系列歌手羅啟豪、黃博、劉洋、李金凱等前晚到主題樂園，出席《神奇4俠：英雄第一步》首映禮。今次是伍允龍與李蔓瑩公開戀情後，首次一同出席公開活動，但兩人拍照後表示要分開做訪問。伍允龍解釋沒有特別原因，覺得公開戀情後大家便不會再追問。問到認愛後會否增加壓力？他說：「反而冇乜壓力，唔使收收埋埋，想去食飯、睇戲都可以名正言順。（見過雙方家長？）見過，就算朋友都有機會見到家長，哈哈！」
問到初次約會是誰做主動？伍允龍表示最初跟女友認識時感覺啱Key，故主動邀李蔓瑩到酒店餐廳吃飯傾偈。問到是否要更努力工作儲老婆本？他笑言：「錢除咗做老婆本，都可以做好多嘢。（心急結婚？）會繼續互相了解。（會寫劇本同女友一齊演出？）唔會為做而做，每個劇本都要視乎角色搵合適人選。我唔抗拒情侶檔，明白作為公眾人物，觀眾有興趣想知得更多。但我希望有啲私人空間，亦會努力作出平衡畀大家知得更多。」
李蔓瑩笑言跟男友分開受訪，可以節省時間以便盡快入場。問到是否介意一同受訪？她說：「要問番佢（伍允龍）同經理人，我係聽話嘅一個。」問到有否打算結婚？她笑言：「冇諗呀，最緊要依家開心。」她坦言不介意情侶檔搵銀，但要先問經理人。
李金凱劉洋擬組「劉金歲月」
劉洋與李金凱透露8月16日於麥花臣場館開騷，不過金凱指演唱會名稱仍未定：「有兩個組合名字，一個係『凱洋』，一個係『劉金歲月』。」問到喜歡哪一個多點？劉洋覺得兩個都不錯，金凱則認為「劉金歲月」比較通順，因普通話「凱洋」不成立。
