雲浩影帶病開工 逛夜市冇得食
赴台南拍MV 被粉紅夕陽震撼
將於下月初在旺角麥花臣場館舉行首次個人演唱會的雲浩影（Cloud），早前飛往台南拍新歌《你的損失》MV，開心經歷了三個第一次，第一次唱台式硬淨風格的情歌、第一次踏足台南、第一次親眼看到粉紅色夕陽。可惜此行她不幸發燒，無法享受當地美食，收工更攰到冇胃口！
「仙氣女神」雲浩影今年第二首派台歌《你的損失》嘗試新曲風，她說：「今次去咗台南拍MV，亦都係我人生第一次踏足台南。《你的損失》係一首台式情歌，有啲似我細細個聽張惠妹同A-Lin嘅歌，仲特登揀咗去台灣拍MV。」
「硬淨」唱腔有新鮮感
一向予人柔弱的Cloud，新歌由歌詞到唱腔都令人感到「硬淨」，連Cloud在社交媒體發文宣傳新歌的文案都散發堅強感覺：「雖然你把我寵得像公主，但背叛公主的騎士，我不要了！沒有你的世界，或許辛苦一點，狼狽一點……但至少沒有心碎！」MV由金像剪接大師李謙明擔任導演，今次是兩人第三度合作，默契十足。Cloud說：「好開心今次台南拍MV，我哋去咗好多好靚嘅景點，仲睇咗我人生目前No.1嘅夕陽，全個天空都係粉紅色㗎！」
MV中，Cloud獨自欣賞夕陽、沙灘漫步、吹肥皂泡、夜市玩攤位，凸顯一個人都可以很快樂。她說：「去咗夜市拍攝，可惜我唔舒服，食唔到好味嘅嘢，加上發燒，收工返到酒店太攰，嗌咗外賣都攰到食唔到，成個人冧咗！」返港好好休息後，Cloud已經痊癒，全力投入綵排演唱會。
