慧嫻讚祖兒 有一姐氣質
兩大天后互笠高帽
容祖兒日前擔任陳慧嫻在杭州舉行的演唱會嘉賓，兩位天后在台上互笠高帽。慧嫻表示祖兒出道時，已看得出對方有一姐氣質，日後必定爆紅。祖兒亦禮尚往來，讚慧嫻是聲色藝俱全的歌手。
陳慧嫻《The Fabulous 40演唱會》巡迴到杭州，邀得容祖兒擔任嘉賓。兩大天后合唱《跳舞街》後，慧嫻說：「我第一次『見』祖兒係喺尖沙咀街頭嘅唱片海報，一睇我就覺得……」祖兒搶着說：「好醜樣啊！」慧嫻笑言：「唔係，呢個女仔一定紅！第二次見佢就係喺一個頒獎典禮嘅慶功宴，佢拎獎，而且佢爆紅啦！」祖兒好奇問：「點解你睇到呢張海報會覺得我有機會呢？」慧嫻坦言是氣質，祖兒追問：「係點樣㗎？」慧嫻說：「唔需要太靚，但係需要有一姐嘅氣質，我一睇你就有呢個氣質。」
不過祖兒不太認同說：「對我嚟講你就係好靚，你當時都係爆紅。細個見到你嘅形象、衣着，都係當時廣東歌樂壇嘅指標，你嘅音樂就係全方位聲色藝俱全嘅歌手。今日可以企喺你舞台上面做嘉賓，我非常榮幸，多謝你。」慧嫻再向祖兒笠高帽：「我係話你愈大愈靚！作為一個歌手，最重要係氣質，靚女大把，但有氣質嘅女仔唔多，你同我都有，哈哈！對我嚟講，容祖兒永遠都係英皇嘅一姐！」祖兒嚇到耍手擰頭說：「你嚟咗我唔係呀，嚇死我啦！」
演唱會加插小短劇
慧嫻坦言很喜歡祖兒，早於2014年慧嫻30周年演唱會已合作。祖兒表示當年獲邀立即「𦧲飯應」，十分感謝慧嫻一直以來照顧，祖兒稱每次演出，慧嫻都會發訊息鼓勵：「佢會話『你做得好好』，對於一個歌手嚟講，能夠收到一個尊敬前輩嘅認可，對我嚟講係非常有意義。」
另外，由今次杭州站開始，演唱會加入洪助昇及梁壁荧演出小短劇，為巡演增添新意。之前兩站分別有關智斌和鍾欣潼任嘉賓撐場，網民大讚：「從嘉賓陣容，睇得出慧嫻圈中人緣勁好。」
