姜濤信花姐 「佢係為我哋好」
為「我最喜愛乜乜」等如冇實力解畫
男團MIRROR人氣王姜濤昨日到尖沙咀星光大道出席籃球活動，吸引近千「姜糖」撐場。對於早前經理人花姐（黃慧君）表示奪「我最喜愛乜乜」獎等如冇實力，姜濤為花姐講好話，指她言論的前文後理應該被剪掉：「佢嘅初心都係為我哋好。」
穿黑色長袖外套的姜濤玩籃球遊戲，熱得不停用紙巾抹汗及飲水，但全程保持笑容，相當專業。他受訪時分享消暑心得，建議大家盡量不要飲冰水：「天氣忽冷忽熱，加上出入冷氣地方，會令腸唔好，溫水符合身體溫度。」他續稱必要時會噴消暑噴霧降溫。
談到早前意外墮海擦損手腳後留疤痕，姜濤笑言：「男仔有啲疤冇乜所謂！」故不會做去疤療程。對於盧覓雪於電台節目中批評他「智商應該有啲問題」，姜濤說：「公司叫我盡量唔好上網睇，驚影響我心情，所以我都冇乜太過留意。所有評論一定有佢嘅主觀性，不過我哋都會用一個客觀心態去睇自己。」他坦言與盧覓雪不熟，有機會想認識前輩。
與Anson Lo冇芥蒂
談到經理人花姐早前指奪「我最喜愛乜乜」獎等如冇實力，但由於姜濤與MIRROR曾多次奪「我最喜愛」獎，故「鏡粉」斥花姐踩自己公司的藝人。姜濤表示要為花姐澄清：「佢講嗰番說話係中間剪咗出嚟，可能有啲前文後理，代表佢唔係真係咁嘅意思，因為佢嘅初心都係為我哋好。（斷章取義？）我未睇過完整片段，但花姐有特登搵我解釋，佢真係唔係咁嘅意思。」對於言論引起「鏡粉」不滿，他笑言：「小心啲啦咁樣！其實我最擔心係佢，因為佢照顧我哋都遭受好多言論，所以我哋都希望呢件事快啲完，其實係一件好小嘅事。」
至於Anson Lo早前跟隊友食飯慶生，但姜濤沒有出席，他解釋當日要綵排及有重要事而缺席，與對方沒有芥蒂：「我都好想去，私底下有同佢講生日快樂，有送生日蛋糕。」
