張衛健大鬧古裝街 「槍戰」爆玻璃
BIG FOUR拍新歌MV話當年
由張衛健（Dicky）、許志安、蘇永康（阿公）和梁漢文（Edmond）組成的BIG FOUR推出新歌《赤子們》，無論鏡頭前後，他們都盡顯默契，Dicky更爆當年於清水灣電視城大鬧古裝街的百厭史！
《赤子們》MV其中一幕，4子「猜包揼」分成兩隊玩足球機，Dicky、安仔大戰阿公與Edmond。比賽過後，足球機零件散落一地，場面搞笑。最終阿公與Edmond以15比8勝出，阿公更獲封「神射手」，他指着Edmond說：「呢個衰公最初Part到我時嗌『哎吔』，即係諗住Part到許志安就贏30比8？」Edmond笑言：「點都好，最唔想Part到你囉！但估唔到你係『神射手』，入得最多係你。」
4兄弟聚首自然勾起不少難忘回憶，Dicky大爆九十年代在清水灣電視城「大鬧」古裝街趣事：「我哋夜晚去古裝街玩，十個人分成兩邊，匿埋再追射……」安仔補充說：「周潤發、趙雅芝拍《上海灘》，周潤發衝入教堂嗰個位，就係撞爛晒嗰度啲玻璃。」
遭高層「照肺」
Dicky描述當時情況：「有人當咗自己係隊長，揸住支槍去到玻璃嗰度『轟』一聲，真係『哼』爆咗塊玻璃，再隊支槍出去話『一齊嚟』！呢個人係四個當中其中一個。隔咗兩日，有人話珍姐（曾勵珍）想見我，珍姐話『你哋玩到冇嘢好玩？係咪好掛住返嚟古裝街開工？有冇搞錯，教堂塊玻璃俾你哋打爛，要你賠，呢度唔係畀你玩。』我就話知道。」安仔笑言：「成條古裝街地下都係BB彈。」Dicky繼續爆料：「我哋試過『走鬼』，因為有保安聽到聲。」Edmond搶着說：「佢揸架保安車入嚟，開個大燈照住我哋話『你哋好出嚟喇喂』，跟住張衛健匿埋喺車底，太多好笑嘢喇！」
