子華拋開執着 破人生地獄
讚許冠文思維Sharp醒冇退化
黃子華、衛詩雅與朱栢康接受本報訪問，宣傳新片《破·地獄》。子華透露拍畢該片後人生有所領悟，就如片中金句「生人都要破地獄」，一定要拋開執着。他曾說過永遠不會再見一位圈外朋友，但早前竟相約對方食飯，因他覺得學懂寬恕別人，才可走出自己的「人生地獄」！
黃子華一生只視李小龍和許冠文為偶像，相隔32年能再跟許冠文（米高）合作《破·地獄》，縱然不是喜劇，他都全力配合這位值得尊重的前輩。他笑言眾人於片場都被米高的威嚴嚇怕：「大家係應該驚，但我唔驚佢，因為我哋已經好熟。不過米高真係好勁，冇任何退化，應該要搵佢研究吓，佢啲邏輯、思維依然好Sharp，思想好全面。」
電影以生死為主題，子華表示拍了這部戲後，與一個自己曾說過永遠不會再見面的人相約吃飯：「你睇完部戲會有一種寬恕、釋懷同珍惜嘅感覺。戲裏有句名句『生人都有好多地獄要破』，呢啲就係人生地獄。」問到還有幾多「人生地獄」要破？他笑言：「你睇唔開嘅就係地獄，當然好彩我睇得開破咗一個。」
衛詩雅跨火盆燒燶頭髮
衛詩雅表示拍攝前提早9個月學破地獄儀式，原因是她身體協調較差。談到她親身上陣拍攝跨火盆，她笑言：「結果拍完頭髮有陣燶味。」她感激子華在片場教呼吸法放鬆，不過子華笑言教任何人學完都回復精神，唯獨衛詩雅走去嘔，她解釋：「因為當日好凍又大風吹住拍，我連食三包煙先會嘔，不過子華又拎咗喉糖畀我潤喉。」
朱栢康同樣在戲中主持破地獄儀式，不過他只提早一個月訓練，因有芭蕾舞底子，幫助極大，最難反而是背熟儀式中的口訣再唱出來，故他從早到晚都不停播着聽，最終於個多星期內學成。
另外，安樂影片出品的《焚城》及英皇電影出品的《破·地獄》，將聯合推出1,000套限量電影套票，讓影迷用「兩票」支持香港電影。套票包含《焚城》和《破·地獄》各一張戲票，可在英皇及百老匯院線使用，售價為120元。11月1日中午12時，限量套票於四間指定戲院開售，包括英皇戲院銅鑼灣時代廣場、英皇戲院Plus+大圍圍方、百老匯MY CINEMA YOHO MALL及百老匯GALA CINEMA（朗豪坊）。
