林超賢再拍港產動作片嗌爽
導演林超賢相隔9年再拍港產動作片，擔任犯罪動作電影《爆裂點》監製及總導演。一向擅長拍警匪動作片的林超賢，儲了9年，新片有什麼最想表達？他笑說：「因為我哋好鍾意呢類戲，由《証人》、《綫人》、《魔警》，都係向着呢種方向去創造，其實都係一個機遇令我哋可走返埋一齊去做呢件事，突然間好釋放、好free，所以癲一次，好爽！」
之前幾年林超賢都是在內地拍大製作，這次回來拍港產片，他感覺氛圍沒有變：「返來熟悉嘅地方，講廣東話，香港拍戲模式依然冇變，好似返回懷抱裏面，同內地拍戲唔同，香港地方小，工作人員亦有限，不像內地經常一千幾百人。」
今次林導找來陳偉霆（William）飾演毒品調查科臥底一角。William被問到開戲前可要裝備自己？他說：「開戲之前有半年時間，主要喺飲食方面注意就可以，外形上冇乜特別要求，因為係臥底，運動我有做開，我有打開泰拳，喺內地開工時經常去拳館，同教練練習，我鍾意打拳腳，最重要反而係心理上、文戲上處理，要應付到林導、神級對手家輝哥之外，仲有黑哥（姜皓文），好多嘢要兼顧，佢哋猛到爆，我個角色又唔可以畀黑哥睇穿。」
陳偉霆望多與香港新星拍戲
問到林導覺得William是否可向打戲方面發展？林導說：「後生仔拍打有咩問題，就咁打係冇用，係要結合戲裏面個力量至有用。」William等了十幾年終有機會跟林導合作拍戲，他坦言睇完首映後覺得自己要再更加努力：「廣東話對白好多年冇講，我拍拍吓都唔知自己好人定壞人，拍打泥漿嗰場戲都拍咗兩個版本，着衫嗰個係『淆底』版，其實我一邊拍一邊摸索自己個角色，我現在好明白導演，因為我個角色隨時會變節。」
William亦直言想拍續集：「拍完《爆裂點》至係真正知道何謂好認真拍一套戲，（之後多留港拍戲？）我好想，因為今次導演起用好多新演員，我好似見到以前嘅自己咁樣，喺片場個種氣氛，好想有機會，佢哋有問我，當年成日被人鬧被人藐，點樣行下去？」他又指見到戲中的年輕演員的腹肌好開心，知道他們日日操肌，就是為演出做好準備，所以他都希望同班年輕人一齊拍，相信會帶給香港電影更多元素。 ◆採訪：梁靜儀、攝影：黃艾力
場地：英皇駿景酒店
林超賢導演
化妝：Angel Y
陳偉霆
髮型：Davy Yu@AdmiXHairStyling
化妝：Khaki yan
造型師: Charlie Chin, assisted by Loby Lee
服飾：Dsquared Leather jacket, Neil Barrett Cargo pants
