專心學業 日後或需減少演出 與粉絲遊電車河 炎明熹獲贈麥皮蟲
香港文匯報訊（記者 子棠）炎明熹（Gigi）於本月初舉行的一連兩場處女個唱，尾場受颱風影響需要延期。Gigi表示：「暫時補場未知幾時，因為我都要考試，好難分心去準備演唱會嘅事情，甚至日後嘅公開演出，次數都有機會減少，所以補場嘅日子，應該要去到明年。」Gigi早前與粉絲一起開電車派對慶祝舉行首個個唱，Gigi更獲贈麥皮蟲 。
提到個唱中長達十多分鐘的跳唱演出，外界一致讚好，有沒有令Gigi燃起做更多跳唱歌曲？她笑言：「我都好想挑戰跳唱，今次嘅演出，對自己嚟講係一個突破，其實跳舞真係好難，唱歌同樣難，所以要好多謝樂隊同跳舞嘅老師們，畀咗我好多力量，希望日後可以拍啲跳舞片畀大家睇。」
提議粉絲聚會打邊爐
而Gigi的粉絲就相當有心，早前起用了兩架不同主題的應援電車，為偶像舉行電車派對慶祝她舉行首個個唱。當日Gigi也親身到場感激粉絲的心意：「今次係fans club一手一腳安排嘅活動，我會先坐派對電車出發，之後轉坐《Only For Me》電車回程，今次係我第一次坐以自己做主題嘅電車，心情好興奮，不過今日可以參與嘅fans人數好有限，希望遲啲可以搞多啲大型聚會，同大家有更多互動，之前有舉行過BBQ，下次可以搞打邊爐，又或者一大班人一齊行山都唔錯，好有氣勢。」其間粉絲向Gigi送上一大盒在《Only For Me》MV場景中出現過的麥皮蟲，Gigi迫不及待把麥皮蟲放在手上把玩，還好奇地問如何飼養和餵食；並指對麥皮蟲情有獨鍾，覺得牠們「肥嘟嘟」好得意。
自爆拍MV不慎跌倒
Gigi更與粉絲在車上一起舉行大食會、玩遊戲，還自爆拍《Only For Me》MV的瘀事，指由於MV拍攝的地方比較荒蕪，拍攝團隊安排了一架附設洗手間的化妝車給她用來補妝和換衫，豈料下車時只顧擔心甩裙，一不留神整個人撲在地上，她也忍不住取笑自己太笨拙。
對年底衝獎持平常心
此外，提到年底的各大音樂頒獎禮蓄勢待發，剛憑《Little Magic》奪得四台冠軍歌，新作《Only For Me》網上點擊亦突破百萬，總算交出了亮麗的樂壇成績表，會否令Gigi對獎項更有勝算？「我對獎項冇乜期待，順其自然係一個最好嘅結果，大家唔使太擔心，自己都唔好咁在意，雖然每一個獎項對我嚟講都係一個好好嘅鼓勵，但只要我做好自己，大家繼續支持我，對我嚟講已經係一個好好嘅推動。」
