蔡潔晒玉背借醉吻展鵬 吳若希被梁漢文撲倒
香港文匯報訊（記者 子棠）蔡潔在前晚的一集台慶劇《香港人在北京》中，上演了一場向陳展鵬床上獻吻戲被拒，但蔡潔表示沒有尷尬，因大家都是專業演員，大讚展鵬厲害之處就是不會令人緊張，能在輕鬆氛圍下完成拍攝；反而自曝最初獲悉與展鵬合作時，曾經擔心招架不住。她說：「因為我嘅角色要Lead住佢嚟行，但佢氣場咁勁，我心諗得唔得㗎？而展鵬喺劇中對住我同吳若希都係處於下風，但佢Carry得好好，演出角色的可愛和天真，一出場就會Catch到大家嘅眼球，但又唔會太鋒芒畢露，我終於領教到視帝嘅功力。」提到劇中有大露背晚裝大晒白滑玉背的場口，蔡潔笑言：「我都覺得個造型好靚，其實嗰件晚裝上半身只係得一塊布。至於美白和健美心得，我以前好鍾意飲牛奶，可能同飲得多牛奶有關係！同埋我幾喜歡練背肌，但唔係練大隻嗰種，練背肌除咗可以保護脊椎令到女士線條更凸出，仲可以令到塊面更Firm。」
吳若希和梁漢文在昨晚亦有一個近距離接觸的怕醜兼撲倒場口，吳若希稱讚梁漢文說：「佢親和力好強，同佢做對手戲唔會好驚，同埋佢會令到我好想同佢傾偈，合作得好開心，好似多咗個哥哥咁！」另外，劇中與戴祖儀姑嫂合體同台演唱，吳若希透露：「喺未拍呢套劇之前，我係未試過企喺一個咁大嘅舞台演出，所以有好多唱歌場口真係有一種開騷嘅感覺；亦係拍完呢套劇我先夠膽開屬於自己嘅個人演唱會，呢套劇喺唱歌事業方面真係幫咗我。」
