麥玲玲首度約會老公睇三級片 黃紫恩為脫單決定封嘴
香港文匯報訊（記者 梁靜儀）堪輿學家麥玲玲主持的全新清談節目《玲玲友情報》，明晚（6日）一集主題是「出Pool」，「唔玩風水玩吹水」的玲玲姐請來戀愛教練Angus分享工作上遇到的趣事，還找來J2er黃紫恩（Jojo）、胡美貽（Nicole）和蔡景行（行仔）齊齊吹吓愛情水。
玲玲姐自爆遇過不少有奇怪擇偶要求的客人，開心Share完還忍不住警世地感嘆謂：「你Set到條件好高時，先望望自己，要求愈高，成功找到心儀對象機會就愈低。」
吹水期間，玲玲姐自爆老公當初擇偶條件亦相當不切實際，又大爆老公刻意挑選「平民餐廳」作首次約會撐枱腳地點，全因想測試約會女士人品和質素，豈料不但因而一度激到約會對象拂袖離座，玲玲姐亦吃迴轉壽司吃到扯晒火：「好麻煩，食住嘢都要不斷TUN位，嘩！真係想打人，好彩我個人唔現實啫。」自命「魔高一丈」的玲玲姐，又自爆首次跟老公約會節目是睇三級恐怖片，而且老公竟比她更驚青，相當勁爆。
節目中，Jojo和行仔更會自揭及被揭單身真相，當中Jojo自覺只是因「要求高」，出Pool無望的Jojo，竟遭工作人員圍插「太麻甩、太嘈、樣衰、成日亂噏、頭大身細、胸唔夠大、太過性感及講嘢太快」，Jojo事後不但大方承認「全部都啱」，更坦言為了要出Pool決定封嘴。
