林明禎帶媽咪 坐昂坪360全景纜車
香港文匯報訊 有「大馬女神」之稱的林明禎日前帶同媽媽一齊為昂坪360拍攝廣告。林明禎寓工作於娛樂心情大好，不時擺甫士自拍，還自爆是纜車迷：「今次係我第一次坐昂坪360纜車，不過如果去海外旅行，纜車係我指定嘅景點，所以一聽到話為呢度拍攝宣傳片，可以搭幾乎係全透明嘅車廂覺得好特別，我就話點都要接呢個job。呢日同媽咪一齊開工，佢都玩得好開心，我見媽媽都影咗好多相，所以計劃遲啲帶埋家姐同細佬再來多次，當作係家庭旅行。」
由於纜車四面及底部均由全透明強化玻璃製造，明禎起初以為自己會畏高，豈料她因掛住睇風景而唔記得驚：「搭纜車沿途有山有水，所以掛住睇風景唔記得驚，仲同媽咪喺車廂度周圍自拍！其實我自拍都有秘技，就係影好多張相，影到自己滿意為止，再慢慢刪去唔好睇嘅照片，不過有人幫我影就更好！所以如果男仔識幫女仔影相，係會加好多分，大家記得追女仔前要先增進攝影技巧。」
聖誕節在即，明禎渴望放假與家人共度：「今年聖誕要留港工作，所以好懷念未入行之前跟家人開Party、看看燈飾的時候！我已經準備好禮物送給他們，始終我工作較忙，平常少時間陪媽媽，要好好報答她。」
