劉佩玥廚藝零進步 笑言另一半需接受
香港文匯報訊（記者 梁靜儀）劉佩玥（Moon）昨日到黃埔出席超市即食食品活動，並在即食食品上加上裝飾，獲大廚讚有藝術天分。不過四年前因參加煮食節目而被封為「 地獄廚神」的她，被活動主持陳浚霆問到煮食心得時，她慚愧說：「廚藝仲未有改善，因工作太忙，冇時間去學煮食鑽研廚藝，所以keep住水準。」
活動後阿Moon接受訪問，被問到是否結婚才會想學烹飪？她笑說：「另一半都要接受我呢樣嘢，因為係我其中一樣嘢，（緋聞男友周志文已接受？）我暫時冇結婚打算，現在即食食品都好方便，（志文可有投訴過？）冇人投訴我，爸爸媽媽都冇叫我學煮食，因我爸爸煮嘢好犀利，佢有話過如果將來老公挑剔，一係叫對方煮，一係爸爸包養我一世。」換言之她的未來老公要與外父外母一起住？她說：「將來才算，今時今日女仔冇話一定要結婚，暫時冇結婚打算，一切隨緣。」
她笑言現時其興趣是努力工作賺錢，而她很開心與林盛斌（Bob）在劇中的情侶檔受歡迎，在街上都有街坊叫她的角色名，令她好開心，她又劇透說：「我哋呢兩個角色好有火花，距離大結局仲有3日，我向大家保證，一定唔會令大家失望，結局大家一定估唔到，基本上我哋都唔知結局，因為導演拍咗啲場口，睇觀眾反應至再決定，其一大家冇諗過丁子朗會出返嚟，其次係我同Bob會點？係最甜最溫馨，係狗血中一點甜，第三係大家想知我同好姊妹陳瀅會唔會和好？」
穿兩條褲打底
另外，提到前日陳瀅出席宣傳活動時，因短裙過短令到上台時疑似走光，Moon相信對方不會走光：「佢有做足安全措施，不過女仔聽到走光會好緊張，有唔開心好正常。（你有冇幫手過目？）佢坐喺度時，我有幫佢遮，但上台時冇為意，但佢一定有打底褲，（因為拖住你搞到走光，你覺得唔好意思？）佢因為太愛我啦，佢好想同我一齊上台就拖住我，下次我會用自己龐大的身軀為陳瀅遮擋，我好佩服陳瀅不論係服裝定係髮型上都肯作新嘗試。」說到她昨日也是穿短裙出席活動，可會驚走光？她自爆穿了兩條打底褲，又稱連穿短褲都打底，是「打底王」。
