與無綫傾續約 亦想內地發展 高海寧自認處於人生交叉點
香港文匯報訊（記者 梁靜儀）高海寧（高Ling）與張振朗昨日出席主演的無綫新劇《童時愛上你》宣傳活動，之前有傳高Ling拒續約無綫，銳意返內地發展，高Ling說：「如果有機會打開另一個巿場唔係壞事。」而她坦言正處於人生交叉點。
昨日高Ling、張振朗、胡楓（修哥）、袁文傑、楊卓娜、吳家樂、尹詩沛、黃建東、區明妙及林俊其等，出席新劇宣傳活動，劇中高Ling飾演智商只得8歲的行政總裁，為配合角色，一時扮可愛小狗甫士，一時又伏在修哥的手臂影相。
年初返了內地工作的高Ling，相隔近半年回港出席活動，她表示今個月17號回港，隔離完即出關為新劇宣傳，之後亦要再返回內地工作。高Ling對上一套劇集已是去年播出的《七公主》，對於再有新劇播出，她坦言很期待，睇宣傳片發現自己都演得好放。問到劇中可有性感演出？她預告會有性感演出：「我有場出浴戲，講我因為得8歲智商，沖涼唔識除及着Bra，沖完涼冇戴Bra着住件白Tee就走出嚟，嚇親同住嘅張振朗，不過事實上我當然有打底啦！」
今次是二人首度正式合作，高Ling大讚跟振朗是好對手，合作開心之餘，大家更會有交流，她笑說：「振朗會自度好多對白及爆肚，每次接招自己就好似考試。」振朗解釋：「我演戲時鍾意收埋一兩句對白，喺重要場口先講出嚟，因為想對手有真實反應，唔係想搞對手。」高Ling續稱振朗是互相幫助，聽到突如其來的感人對白，眼淚會自然流出來。
振朗又稱首次跟高Ling合作很有火花，又感謝她每次穿平底鞋遷就雙方的高度很體貼。問到二人在劇中有否親熱戲？振朗即說：「我唔搞?妹㗎！」高Ling自言劇中只有8歲智商，跟振朗是純潔的愛。
袁文傑大罵胡楓事後道歉
另外，高Ling被問到跟無綫的合約問題，她表示跟公司仍在洽談中：「好多嘢可以合作得更好，公司好有誠意，同公司一直以來合作得好開心，今次返來都會傾合約，（續約成數高唔高？ ）傾吓條件，（加薪？）有加薪，（續約換獎？）咁耐以來一個獎都冇，好明顯咁多年都冇做過呢件事，攞獎係睇天時地利人和，最重要係角色得到觀眾認同。」她續稱其實跟公司合約仍未屆滿，至於有傳她銳意在內地發展，高Ling就說：「如果有機會開拓另一個巿場、試多啲新製作唔係壞事，今次返內地拍綜藝節目都學到好多。」當問到可有其他公司向她招手，高Ling未有正面回答，但就承認正處於人生交叉點，要想清楚自己的前途，至於感情事就順其自然。
袁文傑透露在劇中飾演集團長子，經常跟妹妹高Ling爭權，首集更會大罵劇中父親胡楓，他笑說：「嗰場戲係我入行以來聲浪最大嘅一次，排戲時冇諗過去到咁盡，但去到拍攝現場感覺同氣氛令我爆咗出來，拍完我都覺得好似過火咗，都有同修哥（胡楓）講唔好意思，佢就笑笑口囉！」
他指今次的角色很有機心，跟飾演其太太的尹詩沛有如雌雄大盜，兩人更有不少床戲，因他們經常會在床上傾偈及諗計如何去爭產。問到可擔心角色乞人憎而被觀眾大罵？他笑說：「我喺舊公司都試過畀觀眾鬧，係要大家睇到入心入肺鬧我先好，好過不痛不癢連鬧你都費事，希望大家鬧我啦！」
