黃埔街坊酒家星級菜式味道正 廚師即烤乳豬燒鵝
早前，朋友推介在黃埔裏有間酒家的菜式味道好，食材真材實料，價錢合理，於是一班朋友開開心心去品嘗，原來是由一班從事海鮮批發起家的老闆黎日祥、劉洪光等開的星級水準的街坊酒家。筆者先試康和閣的招牌菜新鮮葱油雞、秘製叉燒、秘製燒腩、冰皮燒鵝、雙冬枝竹羊腩煲；再試金萬年酒家的冰鎮六頭南非鮑魚、海味凍食聖子王、即烤燒乳豬乳豬全體、脆皮雞、葱花香煎鮮魚扒、牛魔王等，食物份量和質素相當有水準，你會講句：果然無介紹錯，當日食過的幾個朋友之後還帶家人及朋友再去幫襯。◆採、攝︰焯羚
負責金萬年酒家的劉洪光老闆很大方，讓我們進去酒家禁地——廚房參觀拍攝其廚師即場烤乳豬、燒鵝情況，相信是覺得真材實料不怕讓你睇。結果，鴻運乳豬全體上台時，大家急不及待起筷，熱辣辣皮很鬆脆，好快就食個清光。之後，他們的海鮮菜式令眾人無不稱讚，冰鎮六頭南非鮑魚比其它大有特色，鮑魚很大隻，要用刀叉食，難得是鮑魚有類似杞子當歸藥材味，好清新﹗沙律盞百花釀帶子、葱花香煎鮮魚扒都帶有西餐風味的粵式烹調法，魚扒大大塊啖啖肉，魚皮好滑，完全感受到魚皮的骨膠原，食完一片飽一半。而海味凍食聖子王，新西蘭蟶子王條條勁粗，碌炒完又唔會韌﹔慢煮牛肉唔韌唔老保留到牛味﹗
到康和閣的客人必食新鮮葱油雞（要預訂），新鮮走地雞上鋪滿葱花，好味到無得彈，連雞心雞潤雞腸都整埋畀你食。他們的手工菜千葉豆腐，好靚又好食。粉葛赤小豆鯪魚煲豬踭粉腸湯，一出場大家嚇一跳、湯料都大大碟，湯夠火候味道當然好，粉葛和粉腸大家都食得好滋味。再加上古法羊腩煲配茼蒿菜、臘味糯米飯、豉油皇銀芽炒麵，更讓粵菜魅力發揮得淋漓盡致。甜品紅豆糕、焗布丁都係中西合璧，照顧不同口味的客人，事實上款款都好好食，獲點讚絕對有道理。大家約好當疫情過後再去試其他未試過的菜式。他們不會有固定菜款，客人可以告訴經理預算平均消費幾多錢左右，他會幫你設計一席菜式。
地址：紅磡黃埔花園3期25號地舖（港鐵紅磡站B1出口）
