六友酒店開房傾通宵好滿足 伍詠薇為苟芸慧闢謠沒婚變
香港文匯報訊（記者 梁靜儀）伍詠薇（伍姑娘）及周祉君再次有份為黑色動畫《愛登士家庭2》配音，二人分別聲演梅蒂絲及肥斯特叔叔。今次故事講一家瘟神齊齊整整衝出大宅，變身旅遊達人，用最惡搞方式展開史上最騎呢「stay畸tion」，哥梅茲、梅蒂絲夫婦自駕暢遊海邊，溫絲黛千方百計攞阿哥命三千；帕斯利跌落瀑布、炸咗個峽谷當奏交響樂；肥斯特叔叔更爭啲氣絕身亡。伍姑娘又談到最近《金枝慾孽貳》6個女仔去酒店傾通宵，十分滿足，她又否認苟芸慧鬧婚變的消息。
本身是《愛》劇粉絲的伍姑娘，再次有份聲演梅蒂絲這個角色，她形容心情興奮，並回想起上集獲邀配音時，美國方面要先聽過佢把聲，認為似角色才收貨，而今次雖然配同一角色，但不會比上一次容易，因兩集的故事不同，加上今次她自己及配音導演都有要求，變得更進取，但亦更好玩，最後只用了半日便完成配音。伍姑娘認為做演員有優勢，就是很快便可投入角色，而出來的反應都認為她的跟配英語版的查理絲花朗（Charlize Theron）聲線相似。她又稱當配音演員原來不易，不過有機會都想再配音：「我想嘗試配卡通角色，可以天馬行空，仲有想配寵物，得意嘅聲都想配，仲有第時查理絲花朗啲戲上廣東版我都可以配埋。」
周祉君表示今次配同一角色，感覺像見返老朋友，而難度亦多了：「 今次角色有另一條支線，難度在於比上次多咗一種演繹方式，要用另一個好high嘅音調去配。」
周祉君夠膽可加入staycation
提到staycation，伍姑娘透露早前相約了當年一起拍劇集《金枝慾孽貳》的好友苟芸慧（苟姑娘）、簡慕華、潘曉彤及化妝師好友6個女仔去酒店「爆房」傾通宵：「因為疫情平日好難約齊人，出外食飯食 4個鐘真係唔夠喉，食完飯就走傾唔到偈冇意思，6個人都要講心事，我又唔鍾意過九龍，去朋友屋企瞓我又唔好意思同唔慣， 所以一定要『爆房』，其實都唔夠時間，傾到天光睇埋日出，成件事好圓滿。」
近日盛傳苟姑娘婚變，問到是否幫她散心及開解對方？伍姑娘反問道：「散咩心？咩事開解佢？（離婚？）梗係唔係，伍姑娘喺度，苟姑娘點會有事？冇講呀，因為根本就冇事，我話嘅，完全冇事，但我唔係發言人，唔可以代言佢。」問到會否再約去staycation？伍姑娘笑言會不斷約，因為真的不夠喉。
周祉君表示見到朋友去staycation都好替他們開心，自己都好想去staycation，但每次計劃去之後就會有工作。說到他下次可以join伍姑娘一起去staycation？伍姑娘嚇他說：「我冇所謂呀，佢夠膽就一齊嚟。」周祉君則笑說：「幾娘教子喎！」伍姑娘自爆因為近期沒有工作，平時都是在「量地」，所以才不停去staycation，但覺得「量地」也不是壞事，可以讓自己唞一唞及趁機增進自己的知識。
伍詠薇
Hair： Nichol Yip @HAiR
Makeup： miss 5 studio
周祉君
服裝：CRAFTMAN
