【本報消息】緊張大師前景秀麗
今季開鑼日四班一千米直路賽、一出即勝出自希斯馬房嘅「緊張大師」（圖前駒），同昔日馬王「精英大師」同綵衣，所以立即掀起熱潮，唔止香港，就連世界唔同地方嘅賽馬頻道、或者熱愛賽馬嘅朋友，都紛紛轉載「緊張大師」贏馬片段，同埋問吓呢匹馬係咩底細，擺明視為明日之星。始終香港賽馬需要更多新血，尤其係短途陣營，上季有「速遞奇兵」扶搖直上，「緊張大師」亦令人充滿期待。不過，講起網民及圈中人嘅留言，其中一個相當抵死，有位朋友就喺自己社交平台話潘頓可能要睇脊醫，事關佢騎「緊張大師」時擰條頸向後望其他對手，擔心佢整親。事實上，真係好少見潘頓贏馬咁輕鬆，睇嚟一直想搵另一匹短途好手嘅佢，依家有新拍檔啦。
講完新星「緊張大師」嘅出現，為香港短途陣營注入新血。其實上季香港本應有一匹非常出色嘅短途好手，就係「川河」系馬主何家駒名下嘅「川河達駒」，呢匹灰獸舊年贏完珠穆朗瑪峰錦標後來港，一心挑戰香港短途錦標，可惜備戰過程唔算太理想，結果無功而還。其後於上季尾主席短途獎強勢復出，可惜賽前流鼻血，幕後亦決定讓馬兒退役重返澳洲，交返俾練馬師布烈治訓練，目標就係再贏多次珠穆朗瑪峰錦標。布烈治早前接受訪問時，打算「川河達駒」喺十八號蘭域馬場舉行嘅千一米二級賽索士錦標復出，事關此駒去年亦係贏完呢場賽事後再攻下珠峰大賽，因此今年亦作相同部署。佢初步觀感覺得「川河達駒」同去年一樣咁好狀態，一啲問題都無。
