【備戰檢閱】徐雨石本地薑救星
若論最撐華將的練馬師，徐雨石（圖右）肯定是其中一位，好似幾位弱勢華將黎海榮、巫顯東、黃皓楠及要去到煞科戰先至可以開齋的黃俊，上季都係靠徐廄馬先至可以建功。徐雨石上季取得三十七場頭馬，雖然大部份頭馬都是來自大師傅，其中以莫雷拉及田泰安各佔十場最多，但亦有十四場係由本地薑建功，好似全季只贏得五場頭馬嘅黎海榮，其中有三場便是出自徐廄，分別是「明月千山」嘅兩勝及「如沐春風」；而另一本地薑巫顯東全季取得七W，當中亦有三場是出自徐雨石馬房，分別是「海豚星」、「爆騷」及「皇龍司令」，徐廄亦成為上季為巫顯東提供最多頭馬的馬房。而身為徐雨石徒弟嘅黃皓楠，雖然全季只係贏得一隻徐廄馬咁大把，就係憑「天賜寶」在泥地千二米掄元，不過石哥全季都有提供七十八匹坐騎俾徒弟仔，當中都有十場上名成績。值得一提是上季幾乎開唔到齋嘅黃俊，在季尾獲得石哥多次支持，雖然有多匹實力馬如「電訊巴打」、「佳運來」及「和氣生財」搏失咗，但石哥並沒有放棄給他開齋的機會，在谷草煞科戰提供咗實力馬「有苗頭」，黃俊亦冇辜負石哥一番苦心，終於贏番場頭馬取得零的突破。由此可見，徐雨石對一眾弱勢華將是相當關照，甚至乎可稱得上為華將救星。
