被鄭秀文爆料做事好飄忽 黎明承認生活經常「斷片」
香港文匯報訊（記者 文芬）前晚黎明（Leon）在紅館舉行第二場演唱會，契爺胡楓（修哥）、霍啟剛與太太郭晶晶、導演袁劍偉夫婦、蔡一傑及童愛玲等前來捧場。天后鄭秀文（Sammi）擔任表演嘉賓，Leon分享自創「風呂減肥法」令她哭笑不得，Sammi又大爆Leon小秘密，指他做事好飄忽，好迷離，Leon亦坦承生活經常會「斷片」。
眾所周知Sammi勤力做運動，經常分享滿頭大汗片段到社交平台，她一出場，Leon就跟她分享「出汗」心得，他說：「Sammi，你做運動Keep Fit好勤力，我見你流好多汗。咁你知唔知我點Keep Fit？（你有Keep過Fit咩？）有。（係喎，Fit咗喎！）我係用日本風呂式。（即係點？）首先開個Bath。（除唔除衫？）除衫，然後浸落去。（嘩，好有畫面喎！）諗住自己喺日本，聽風呂音樂浸20分鐘，起身着返件浴袍，房入面開28度空調，食碗辣麵，坐15分鐘，成身流晒汗，肯定冇咗3至4磅。（包你流埋鼻血呀！）唔會啩？（每個程序都咁熱辣辣。）」Sammi笑說：「又浴缸又除衫，好有畫面……見到你啲肥肉呀！家冇，家好Fit！」Leon說：「肥肉會慢慢變少，水分嚟啫！」
Leon再向Sammi請教節食減肥，他說：「有啲人減肥，每日只食一粒豆，你有冇試過？」Sammi說：「一粒豆？減肥？呢個唔係減肥法，係減壽法喎！一日一粒豆真係唔掂，起碼食兩粒，早晚各一粒，飽啲！」全場爆笑。她續說：「好多人都以為我不斷減肥，其實我家做嘅功課唔係減肥係Keep Fit，做運動和食得健康，最緊要健康，肥嘅瘦嘅都唔緊要。今日嚟到呢個舞台見到你，依然咁靚仔！」
Leon戴太陽眼鏡伴舞Rap歌
講到興起，Sammi爆料：「我要爆黎明少少嘢，佢唔知由幾時開始個人好飄，好迷離。幾年前佢打電話畀我，話想幫我監製一首歌。我心諗：乜你識監製歌嘅咩？心裏滿是疑問，不過見你係黎明就好啦！然後你搵咗你老友又係我老友Mark（雷頌德）幫我寫咗首歌《犀利》，我記得你仲話要幫我拍MV。MV？於是我上網查吓你拍過咩MV。點知有一日，你又話我知唔得閒，唔幫我拍MV啦！嘩，乜你咁飄㗎？你啲節奏好難跟呀！」
Leon坦言：「我知我成日講嘢斷片，生活都係咁。（啲人話生咗仔會無記性。）又唔係我去生。（生女可能會好啲。）可能係，哈哈哈！」合唱前，Sammi扁嘴話本來想唱新歌，但Leon卻指定唱另一首，Leon立即轉話題：「Sammi新MV好正，我好期待，聽講拍咗20個鐘。」Sammi說： 「係，好貴！唔係話貴一定好，但好有誠意！（貴一定有誠意）有時唔貴就用誠意搭夠……哎吔，我唔夠你講，我要唱歌啦！」二人合唱《信者得愛》，Leon不但戴上太陽眼鏡伴舞，更Rap歌，Sammi和觀眾都非常驚喜，Sammi大叫：「Leon跳舞呀！」全場歡呼尖叫！
