林夕給千嬅一句話 「快樂中，不必明白快樂」
圖：林夕（中）見千嬅下嫁丁子高，放下心頭大石
楊千嬅和丁子高前日設婚宴，場面熱鬧又搞笑。婚宴上，丁子高給老婆驚喜連綿不絕，其中更拍了一條片，講述自己在產房等老婆生仔，然後穿上肉色緊身衫，於studio裡面扮初生嬰兒，與同着肉色緊身衫的一班兄弟載歌載舞，令台下千嬅捧腹大笑，賓客拍爛手掌。
最愛老婆笑
丁子高其後說：「片裡我雖然好傻好搞笑，做呢啲嘢都係得一個原因，因為我好鍾意見到老婆笑。可以有機會見到我最鍾意的女人笑，係我終身幸福。千嬅，你係冇嫁錯老公的！」另外，婚宴亦播放兩人從小到大，相識、拍拖及在拉斯維加斯註冊結婚的片段。
當晚一對新人進場時，上台交換結婚戒指，切蛋糕，接受現場賓客祝福及祝酒。他們不停多謝搞婚禮的好朋友時，千嬅更大笑道：「點解咁似叱咤風雲頒獎禮……哈哈，好似講緊得獎感受咁，哈哈，今晚我得到呢個終身成就獎，比任何一個獎更加讓我開心感動及快樂，多謝老爺奶奶，送咗個咁好嘅老公畀我，令我搵番自己，唔識講咩嘢，只識講多謝。我最希望係爹哋、媽咪身體健康，幸福快樂，我結婚你哋唔係冇咗個女，係多咗個仔，希望細佬都快啲結婚，咁加埋我哋全家就多咗兩個仔，一個女。」
丁子高說：「我以前一生中最愛三個女人，一個係婆婆，一個係媽咪，一個係姐姐。依家開始，我生命中多咗兩個最愛的女人，一個係我老婆，一個係千嬅媽咪，媽咪我會好好咁照顧千嬅，亦都一定會全心全意照顧你同爹哋（岳父岳母）。」接着丁子高又上台向着千嬅高唱《Nothing gonna change my love for you》，令千嬅十分感動。二人同時上台合唱了張學友和高慧君的《你最珍貴》。
心口個勇字
另外，填詞人林夕上台說：「1996年就開始幫千嬅填詞……其《少女的祈禱》這首歌，從一個少女向天父祈求愛情婚姻，睇住佢大，睇住佢冇壞，睇住佢等到今日夢想成真，我相信得獎都冇咁開心。曾經好擔心，千嬅一日未嫁得出，唔通我要同佢寫首《烈女祈禱》……這位烈女事業上精神上是加分的，但在愛情道路上是趕客的……今晚，送一句話給千嬅：『原來在快樂中，不必明白快樂。』生命在不知不覺間，當你放下心口個勇字，不違意，順從做自己，做到我係我，就自然得到你想要的東西。記得農曆年，千嬅同丁生來我家拜年，我哋一齊打麻將，好多人話，麻將枱上見真章。我睇到丁生對佢關懷同緊張，打牌個陣，千嬅打牌打錯，丁生的笑容一片溫馨，像看着一個小朋友做錯事，但又好痛錫這個小朋友的樣子，我好放心交這個姐妹給丁生。」
