貴圈真亂：黃絲抄淘寶設計 瑜伽衫「吊高嚟賣」
黃絲為咗錢，擘大眼講大話真係濕濕碎。網民「流鼻血硬漢子」早前喺「連登」開post，擺出連串截圖，踢爆自稱香港「自家」品牌嘅店舖「GLAMOURZY」扮黃，甚至搵嚟被指為藍絲嘅KOL幫手宣傳，呼籲「同路人」千祈唔好中計，但有網民就話呢啲情況屢見不鮮，可惜仲係有好多傻仔上當。
帖文列出多張淘寶網站同「GLAMOURZY」嘅產品截圖，指「GLAMOURZY」嘅店主賣嘅瑜伽衫都係抄襲淘寶貨品嘅設計，加個自己設計嘅Logo就賣貴二百蚊到三百蚊，又話店主早前參與黃圈爆買活動，但之後竟然搵嚟被指為藍絲嘅KOL宣傳。
「好多黃店都呃水魚」
帖文列出該店主回覆查詢時嘅社交媒體截圖，發現佢扮唔識該名被指為藍絲嘅KOL，但後來有網民踢爆，店主曾經喺instagram貼出與該名被指係藍絲KOL嘅合照，仲配文話對方係自己「小學最best嘅best friend」。
網民「Beebb」話：「有晒證據，都水洗唔清啦！冇（無）謂一車車走去送錢比（畀）人啦。」「桐野利秋」就話：「仲以為大話cover（蓋住）大話係work（可行），係佢自己太蠢定以為世界太蠢？」「搖來搖去」直言：「算啦呢D（啲）情況太（大）把，幾多黃店賣淘寶貨呃水魚上當，可以點，講完咪又係有傻仔上當。」
●香港文匯報記者 雨航
