【網議政事】傻根譏竹君喪夫 「黃絲」都鬧佢冷血
今次疫情見到唔少正直醫護謹守崗位，亦見到唔少政棍嘅醜陋嘴險，前者包括一直奮戰抗疫嘅衞生署衞生防護中心傳染病處主任張竹君，後者則係講緊「城邦派國師」傻根（陳云根）。日前張竹君嘅先生病逝，唔少人都感到難過，為張竹君打氣，偏偏傻根就話呢個係「好消息」，仲貶稱張竹君為「瘟君」，揶揄係「終於禍及其家」。言論冷血到咁，就連「黃絲」都忍唔住出聲鬧爆佢。
張竹君嘅先生日前病危，唔少香港人都默默為佢哋集氣送祝福，偏偏傻根前日朝早已經喺fb出post講風涼說話，係「善惡之報，如影隨行」喎。佢跟住又鬧︰「抗疫『暴政』擾民，人人順從惡業，實行公民不抵抗。人讓位放手的時候，自有天行其道。」
到前晚張竹君嘅先生病逝，傻根又再出post「攞景贈慶」，話係香港抗疫以嚟「第一宗好消息」，仲衝出嚟「認叻」話︰「我今早（前日早上）貼文之後，『瘟君』丈夫病逝。皇天做事，陸續有來。『瘟君』一路炮製『瘟疫』害香港人執笠失業，害小孩失學，終於禍及其家。一眾『瘟君』要死趁早，早死早着。」
言論冷血到咁，除咗佢班「城邦派信徒」會留言話「皇天擊殺」之外，普羅網民都鬧爆傻根，就連啲「黃絲」都忍唔住留言狠批傻根冇人性，叫佢積返啲口德。網民「周星星」話︰「頂你個肺，原來香港真係好多心腸惡毒嘅精神病人，唔怪得香港會咁亂！」「Oi Foon Lung」亦話︰「你是一個冷血及無人性的垃圾。」「Afreen Lai」都鬧爆︰「你稱為人渣都當之無愧！」
傻根明顯仍然唔覺得自己錯，噚日仲喺fb貼出自己精選嘅「網友金句」，話「老師難得比（俾）黃藍兩隊合力攻打，證明我們做對了」喎，仲有網民話「黃藍是白痴」，睇嚟喺「城邦派」嘅世界入面，應該得佢哋啱晒嘞。 ■香港文匯報記者 甘瑜
