【網議政事】拆夥分贓不勻 「攬炒巴」SWHK互片
一提起錢，兄弟姊妹都無情講，何況係由利益建立起嚟嘅「港獨」組織「攬炒團隊」。近日涉嫌違反香港國安法並已潛逃外國嘅通緝犯「攬炒巴」劉祖廸日前喺fb度上載影片首次公開亮相，宣布與Stand with Hong Kong（SWHK）團隊和平分家，並提倡由民間投票決定點樣重新分配眾籌資金，最後有五成人認為要「五五對分」。不過SWHK就似乎唔多接受呢個分配方案，想將所有錢都把握喺自己手入面，於是另發聲明稱因法律約束無法實行劉祖廸嘅分配方案，又指如果劉祖廸要動用眾籌資金可以按制度申請審核。面對SWHK全面控制100%資源嘅決定，劉祖廸表示「只能遺憾接受，並和公眾一起監察」。
網傳「攬炒團隊」喺境外網站發起嘅眾籌金額達3,000萬元，劉祖廸就稱目前結餘約1,600萬元。雖然劉祖廸團隊選擇同SWHK分家，但自然都想分一杯羹，於是提出喺Telegram「攬炒Channel」發起為期24小時投票，決定點樣重新分配眾籌資金，結果亦顯示逾五成人同意「攬炒團隊」同SWHK「五五對分」，啱晒劉祖廸心意。
不過，護錢心切嘅SWHK又點肯放棄已經到手嘅巨款，所以又發聲明稱眾籌資金透過GoFundMe籌集受到當地法律約束，一分錢都無辦法分畀佢，「佢提出嘅資金重新調配方案，我哋基於法律嘅約束下無法實行……眾籌返嚟嘅每分每毫，都寄托住對我哋嘅期望同信任。」SWHK甚至拆佢枱，特別澄清「過往所有以『攬炒團隊』為名嘅項目都係由整個SWHK團隊操作。」
當然，SWHK都要為自己塑造一個好人形象，扮晒嘢咁話如果劉祖廸團隊需要動用眾籌所得嘅資金，「我哋必須要一視同仁，繼續透過一年幾以來行之有效嘅制度去申請撥款，而財務管理人員亦會謹守一貫嘅審核標準處理所有申請方案。」咁即係無偈傾啦。
「攬炒巴」暗譏SWHK全控資源獨大
面對SWHK咁決絕嘅態度，劉祖廸都無佢符，惟有死死氣地出個聲明話：「只能遺憾接受，並和公眾一起監察……」，又指「攬炒團隊」希望以五五之比公平分配資源，係避免任何一方傾斜，咁啱得咁橋大眾投票結果又同樣以壓倒性支持五五均分，而不是單方面控制，暗譏SWHK全面控制100%資源係獨大。
另外，劉祖廸好似唔妥SWHK嗰句特別澄清，於是「潤」多SWHK一句，話佢「在前天的《反擊宣言》中，我們沒有說SWHK團隊半句不是。」
「攬炒團隊」分贓不勻，網民紛紛食足花生。「Vi Ye」認為：「似乎雙方之前無商量過，甚至SWHK事先唔知情尋（噚）日『攬炒巴』個公佈（布），所以錢銀上無共識，要出文回應？」﹔「Sabola Inn」鬧SWHK：「已經vote左（咗）50-50，係最好方法。點解唔肯？你地（哋）乜都唔做，只用錢請lobbying company講下（吓）人權。點重光呀？」，又問「分左（咗）點claim？Legal理由同claim只是拒絕借（藉）口。」
「Mark Ho」就認為劉祖廸另有心思，「其實呢啲嘢你私底下拆掂去（佢），拆唔掂再眾籌啦，而（?）家感覺係1.你哋係鬧不快分家，2.你想用群眾壓力獲得部分資源。」 ■香港文匯報記者 郭家好
