區諾軒寸搞民調卸責 「鞭屍」「飯民」反被鬧爆
決定傳統「飯民」立法會議員去留嘅「民調」早前揭盅，但無論係走定係留，都被立法會前議員區諾軒「鞭屍」。有「黃絲」就覺得區諾軒都係「主留派」，所以爆粗大鬧佢唔聽民意支持延任，結果被區諾軒寸佢「搭錯線」。有網民懷疑被法庭裁定非妥為當選嘅區諾軒，因為連選擇嘅機會都冇而四圍「鞭屍」刷存在感，叫佢咁得閒不如學返好啲英文，專注返「民主國際線」喎，究竟咩事呢？
早前話唔想再講延任呢個話題嘅區諾軒，喺「民主派」議員宣布去留後就出嚟「鞭屍」，話政治人物應該領導民意，唔應該「俾民意牽引」，而不論離任定延任，只要講清楚理由就足夠，可惜主留「飯民」決定匿喺民調後面。
佢話，走嗰啲想走就直接打辭職信，唔應該問完其他「飯民」議員走唔走後，又唔當一回事，然後喺另一個post再講：「有時候，扮聾都係好重要的。」唔知係咪寸緊主留「飯民」既然已立心延任，都係要搞場大龍鳳以「名正言順」呢？
不過，「黃絲」網民「Roy Lee」就乜都唔理，仲將所有不滿發洩落區諾軒身上：「大多數叫你地（哋）唔好做，你地（哋）咪又係為錢玩留任！你地（哋）唔止扮聾，仲埋沒埋你地（哋）既（嘅）良心呀 ! 明知唔夠票，再做都係俾建制（派）食住上 ! 所有『惡法』一樣通過，你地（哋）袋多百二萬（元），但就出賣所有香港人啦 ! ×街！」
區諾軒就回覆話「Roy Lee」搭錯線，仲問：「係咪可以講粗口鬧番（返）你架（㗎）……你同《文匯報》『作野（嘢）』屈我有咩分別呢？」
網民寸不如惡補吓啲英文
fb專頁「國際化本土日常生活」就覺得區諾軒係自己攞嚟衰，仲話如果佢得閒開post寸人，不如惡補吓啲英文喎。事關區諾軒早前接受外媒Reuters訪問時講到九唔搭八，俾個「澳洲佬」嫌英文廢，最後人哋連稿都唔想寫。個post最後仲揶揄：「（區諾軒）對號入座啦，人哋（外媒）就真係唔扮聾都聽到一舊（嚿）雲『什麼』喇（啦）。你記得個澳洲佬嘅。」
「James Cheung」就覺得區諾軒只好眼紅昔日「戰友」有得留低：「如果政府宣佈（布）恢復佢同范國威嘅議席……」「9up Finance」就回覆：「你就會聽到『雪雪』聲。」「Kay Li」就話：「呢條友個post擺明博人×，睇到火都黎（嚟）！」「Wing Mak」亦批評：「阿區生你真豬隊友嚟」「David Wang Da Wei」就話：「無用架（㗎）『黃豬』一樣好buy（支持）。」
■香港文匯報記者 鄭治祖
