暌違23年再坐鎮TVB台慶 羅嘉良變身「奇哥」憶拍劇歲月
羅嘉良暌違23年再踏TVB台慶舞台。他昨日率領羅天宇、鍾柔美、劉展霆、關嘉敏、游嘉欣、賴彥妤、馮熙燮等近30位藝員，到電視城為19日晚舉行的《萬千星輝賀台慶》開場大型歌舞進行綵排，羅嘉良更「奇哥」（《難兄難弟》角色）上身，又唱又跳。
●香港文匯報 記者 梁靜儀
羅嘉良表示，自2003年離開TVB後，已有多年未有參與台慶演出，但亦曾出席擔任頒獎嘉賓。談到「奇哥」再現，他表示今次是監製提議他演唱《奇哥》及《難兄難弟》，前日更入錄音室重新灌錄兩首歌曲。他說：「我拍《模範律師團》時，監製已經問我有冇時間返嚟，我話有時間一定要返嚟啦，我屋企（指TVB）嘛。」
讚拍《難兄難弟》樣樣好
他又指，今次勾起不少拍攝《難兄難弟》時的美好回憶，因為這是令他非常難忘的一部劇集。「好多謝監製鍾澍佳寫咗一個咁好嘅劇本畀我哋玩，嗰陣時我哋每一日最攰嘅就係笑，因為每一場戲都笑到趴喺度。好開心拍呢部戲，感覺好快就拍完；同埋對手好好，吳鎮宇、張可頤、宣萱，個個都好啱做，每個角色都fit到爆，出嚟個效果好，收視率又好，我哋張唱片又賣得，仲攞到雙白金，所以我覺得好運。」
他透露，當晚正式演出時，參演藝員人數還會增加一倍。他又大讚一班新人對他十分有禮貌，其中令他印象最深刻的是在《正義女神》中飾演「高成彬」的劉倬昕。「我一入去就見到高成彬，我即刻同佢搭膊頭傾偈。佢好好，好謙虛，好nice。其他人我唔太識，因為啱啱返嚟。其實我拍《模範律師團》之前都唔識劉佩玥、張曦雯（Kelly），只係拍之前睇過佢哋啲資料。𠵱家識咗，合作過後覺得佢哋好聰明，合作得好愉快。」
問到是否因為吳卓羲（Ron）的關係而認識Kelly，他笑說：「我又唔理呢啲嘢嘅。（有冇見過阿Ron嚟探班？）阿Ron冇探班喎，我冇見到佢，佢有冇偷偷嚟探班我就唔知啦。探班好正常，朋友嚟嘛，幾好呀，大家開開心心就好。（覺得二人合唔合襯？）劇裏面好襯，劇外都係男才女貌。」
難忘剃毛反串演出
談到近日電視台經常重播經典劇集，羅嘉良表示除了《難兄難弟》外，《先生貴性》也是他十分喜愛的作品。他說：「喺《先生貴性》入面我要扮女人，我未試過。首先我要過到自己嗰關。之前我因為肝炎入院瞓咗一個禮拜，嗰陣時已經知道有呢部戲。後尾阿戚（監製戚其義）同埋珍姐（高層曾勵珍）嚟醫院探我，問我演唔演到。我考慮咗一晚就答應咗，因為我覺得做演員好難得有一個咁具挑戰性嘅角色。」他最難忘的是拍攝過程十分辛苦，除了在炎熱天氣下頻繁轉妝，還要剃腳毛及腋毛。不過最令他印象深刻的是要扮演被陳慧珊「上身」的狀態，因此他更提議對方現場示範一次給他參考。
提到近年TVB將經典劇集改編成AI短劇，羅嘉良笑言，如果真的要翻拍，不如拍106集的長劇《創世紀》：「我好想睇吓短劇可以剪成幾多集出嚟，可能要過千集。」
談到曾合作拍攝《天地豪情》的張家輝將於明年舉行演唱會，羅嘉良直言有興趣入場支持，並關心開騷日期。當得知演唱會於農曆新年期間舉行時，他說：「咁好嘅檔期？咁似我哋嗰陣時《難兄難弟》做舞台劇，都係年初一，做咗六場，喺紅館。（家輝都係紅館？）佢個卡士梗係紅館啦，佢好搞笑，佢真係好犀利。」
