成「華語最長壽不變陣組合」 草蜢獲古天樂頒健力士證書
香港文匯報訊（記者 余雁）一連兩場的草蜢《THREE IN LOVE演唱會－澳門站》日前於澳門威尼斯人綜藝館舉行。草蜢在頭場即興邀請觀眾席上的「鐵粉」容祖兒上台合唱，而第二場的表演嘉賓則是老友古天樂。除了跳唱《今期流行》外，他更以「演藝人協會會長」身份，宣布草蜢成為「健力士世界紀錄」的「華語最長壽不變陣組合」。
當晚，容祖兒原本在觀眾席睇騷，突然被草蜢召喚上台，她立即急急腳穿過觀眾席登場。四人互相擁抱問好後，蔡一智（阿智）說：「我知道祖兒好忙，因為佢明年一月將會喺香港啟德主場館開演唱會。」蔡一傑（傑少）感性地說：「我真係好開心睇住祖兒唔同嘅階段，一路變好，一路進步，成為今日嘅天后，真係好正！」祖兒說：「好似阿智所講，我哋係FRAMILY（Friend+Family），認識咗你哋之後，我多咗三個大哥哥。」
阿智難忘在前輩羅文家拜年時初次見到祖兒，蘇志威爆料：「其實更早之前喺歌迷聚會見過你啦！」祖兒說：「我由細到大都係你哋嘅歌迷，好細個就聽你哋嘅歌，當我入咗行真係可以同你哋合作，你哋好錫我，睇住我唔同階段嘅成長，呢個經歷真係好特別，可以一齊為香港嘅樂壇努力。」
而第二場的表演嘉賓古天樂出場，與草蜢跳唱《今期流行》，全場High爆！其實草蜢與古天樂識於微時，非常老友，傑少表示在古天樂未出道時已互相認識，蘇志威與他更拍劇朝夕相對半年，至於阿智是他的健身教練。之後他們合唱30年前、由古天樂為草蜢MV做男主角的歌曲《原諒我是我》。唱畢，古天樂認真地表示另有重要任務，就是以「演藝人協會會長」身份，宣布草蜢成為「健力士世界紀錄」的「華語最長壽不變陣組合」並頒證書，亦邀請「健力士世界紀錄」官方認證官Jacob Yip上台詳細說明。
解散之說純屬誤傳
認證官Jacob說：「要得到呢個紀錄要符合三個條件：第一，草蜢係『華語組合』，作品主要係廣東話和普通話，過去超過40年，佢哋為華語地區注入咗音樂及舞蹈嘅力量。第二，『最長壽』，我哋以年和日作計算，以1985年7月4日草蜢喺香港利舞臺參加第四屆新秀複賽，參賽歌《一起衝》，呢個紀錄衝到𠵱家嚟到威尼斯人呢個舞台，總數係41年112日，每一年都要對演藝有相當嘅貢獻，例如唱片、演唱會、廣告、商演同埋代言等。我同資深傳媒人鄭丹瑞先生、音樂人陳光榮先生，由1985年睇到2026年，的確係每一年沒有斷續喺音樂同埋舞蹈嘅貢獻。其實係極其艱難，好似馬拉松咁三個人要一齊跑，仲要係世界級嘅水準。」
「第三，『不變陣』，成員人數由1985年7月4日起，都係蘇志威、蔡一智、蔡一傑，三位，中間沒有任何變更。呢段關係的確好厲害，真係做到無論順境逆境、貧富、健康與否，都係一起衝。」蘇志威說：「I Do」全場爆笑。然後由古天樂頒發證書給草蜢及大合照留念。
阿智說：「我哋三個會繼續努力，應承大家，我哋會有更多更好嘅作品、更好嘅演唱會送畀大家。」蘇志威說：「有幾年曾誤傳我哋無嘢做解散，其實嗰幾年我哋一直都喺世界各地演出，今日得到健力士證實我哋係冇試過分開，多謝！」
