【粵語講呢啲】食我嘅，着我嘅；又食又搦、又食又拎、食完兼夾搦
●梁振輝 香港資深出版人
廣東人有句俗語：
食我嘅，着我嘅
表面的意思是「吃我的，穿我的」；通常用來形容那些生活完全依賴他人經濟資助的人。
此話通常出現於以下的語境中：
長輩對晚輩的訓話——父母在管教子女時，強調自己付出了養育費，要求子女聽教聽話。
示例1：
衰仔，「食我嘅，着我嘅」，咁夠膽頂撞我！
涉及對伴侶的支配性——在一段經濟不對等的關係中，經濟來源的一方會用此話來強調自己所處的地位及重要性。
示例2：
咪以為「食你嘅，着你嘅」，你就可以支配我嘅一切；奴隸都有尊嚴嘅，再咁落去，搵定律師搞離婚喇！
不滿對方賴皮、啃老——拿了好處卻不懂感恩。
示例3：
老媽子，今個月啲「零用錢」仲未過畀我喎！
成三十幾歲人，仲攤大手板，知唔知醜㗎？
生仔養仔，天經地義；唔想養，咪鬼好生囉！
「食我嘅，着我嘅」，唔感恩不特止，仲講埋啲咁嘅嘢嚟激我！
「食夾拿」（食及拿），廣東人多會說成：
又食又搦；又食又拎；食完兼夾搦
「搦」指握、持、拿着；「拎」指提，與「搦」近義。「搦」「拎」的文讀分別是「nik1」「ning1」；俗讀分別是「lik1」「ling1」。「又食又搦」比喻在某個場合中，不僅已享受到應有的好處，最後還要額外索取更多利益。
「又食又搦」的現象在某些場景中很普遍：
赴宴時，客人除了在大飽口福之餘，臨走時還要打包剩菜（基於貪婪多於環保）。
吃「自助餐」或「日式放題」時，顧客擅自帶走飲品甚至生蠔、肥牛等生鮮食材。須知道，此等行為可能構成盜竊罪。
到親朋戚友家中作客，有人熟不拘禮，主動把剩菜打包拿走。當然，我們不排除有主人家熱情好客，在客人離去前會主動塞大包小包的土特產予客人帶回家。此時有人說自己「又食又搦」，以示不好意思或感激。
「又食又搦」也會用來形容那些已從別人處獲得豐厚利益後，仍貪得無厭，最終試圖榨取對方身上一切可榨取之物的人。簡單來說：
便宜佔盡、好處拿盡
示例4：
搞掂嗰單交易，阿輝唔止攞到公司發放嘅豐厚分紅，私底下仲收咗人哋回扣，仲唔係「兩頭瞞、兩頭賺，又食又拎」！
示例5：
六旬嫖客「又食又搦」，享溫柔後毆劫鳳姐，掠逾萬元。
一名六十多歲老翁，前晚光顧觀塘一間「鳳樓」，完事後不只拒付肉金，更搶去鳳姐的錢包。在爭執過程中，這名性工作者遭到毆打並受了傷；淫賊隨後逃離現場。目前，警方正在展開調查。
「又食又拎」也會用在所有好處兼得的情況中。
示例6：
為為同輝仔「過大海」（去澳門）真係可以講得係「又食又搦」嘅完美版：
有朋友響賭場儲到積分，除咗益佢哋兩晚免費房，仲醒埋啲賭場餐券過佢哋，搞到兩日四餐都有着落，名副其實嘅食住全包！
為為手風順到唔知點，無論入邊間賭場都有多少斬獲；唔止豪買手信，仲買咗對名牌波鞋，都咪話唔爽！
輝仔話自己冇乜賭運就冇玩，淨係響房度擸晒啲免費飲品、茶包、咖啡包同杯麵，真係食得唔好嘥嗰隻！
到位的打油詩，除了「順口」還要「抵死」，如下的一首可供參考：
有人請我去飲茶，我就食完兼夾搦；叫我搵日請返餐，我話情願腳伸直。不論係遠親，抑或係近戚；講到錢呢層，完全冇交易。
