【地產箴言】怎樣令租客快啲續約？
湯文亮博士 紀惠集團行政總裁
有朝早去到茶餐廳，有客人話有一個租客，明明生意都唔錯，一定要續租，但唔知點解租客遲遲未落實續約，後來他發覺，租客認為租金仍然有下調空間，愈遲續約，租金愈低，有乜辦法可以令租客快啲續約？
老闆有十幾個單位收租，對於要租客早少少續約，夠晒經驗，不過，見冇人搭口才出聲，老闆話，只要同租客講，今日續約的租金已經是最低，未來只有上升，不會下跌，如果夠堅定，租客唔單止續約，仲會要求延長租期，否則，如果租金上升10%，即是兩年租約，無端端多交兩個幾月租金，現在續約，可以得到兩個幾月免租期。
美債想人買同樣道理
美財長貝森特應該向茶餐廳老闆學習，現在美債不斷加息，評級AA+的10年美債息已經去到5.25 %，比AA級的債券高出接近1%，但仍然冇人吼，並不是美債不安全，如果唔安全評級冇可能咁高，而是打算買美債知道美國會加息，暫時不買美債，事實上他們亦估中，美債息不斷上升，唔好睇少只是加0.25%，十年計數，即是2.5%，大約半年收益，等多一陣，可以多收半年債息，值得等待，所以，只要美財長放出聲氣話美債息將會下跌，最少1%，我相信打算買美債的人會急不及待，加租租客才會續約，減息才會吸引投資者買美債。
不過，講開又講，茶餐廳上有客人話，剛同一個租客簽了新租約，比市價高兩成，但絕對不值得慶祝，因為租客願意付不合理的租金，代表租客的生意命不久矣，租金不合理亦不爭取，同時準備租客在執笠之前有一段時間冇租交。
