林寶玉任女團評判總監 被新世代潮語考起
香港文匯報訊（記者 梁靜儀）林寶玉日前為女團成員選拔活動擔任評判總監。是次活動不設年齡限制，以才華為先，計劃招募12位女團成員，正式出道成為藝人。林寶玉透露，部分參賽者相當有質素，但亦有部分表現相當「出人意表」，令她面試時強忍苦笑：「有啲參賽者事前冇乜準備，表現只得一半水準，過程仲有好多dead air時間。不過我好欣賞佢份勇氣，佢反問我覺得佢表現成點，最後仲話希望大家可以喺女團見到佢嘅表現。好彩我經驗豐富，呢啲場面先唔會尷尬到唔識答！」
曾擔任選美評委的林寶玉，對出任女團評判總監感覺新鮮：「今次活動雖然不設年齡上限，本來都諗住擴闊年齡層，但嚟面試嘅大多係十幾歲少女，感覺幾新鮮。當然年紀唔係問題，最緊要展示女團嘅活力同生氣；選美同女團始終有啲唔同，選美睇言談、舉止同形象，女團就最睇舞台爆發力。」
面對一眾年輕參賽者，林寶玉笑言被新世代「潮語」難倒：「Gen Z嘅潮語真係未必明！有個參加者話自己曾經出道做『日系地下偶像』，我真係唔識，仲問佢係咪即係識講日文？原來意思類似『地下樂隊』，即係唱日文歌、跳日系舞嘅少女，但唔喺公開主流場合表演。呢個詞真係令我大開眼界！」
