【粵語講呢啲】冇衣食；冇啖好食；食人食出汗，食自己食出眼淚
●梁振輝 香港資深出版人
「衣食」指衣服和飲食，泛指生活所需。古語有云：
衣食者民之本
意為衣服和食物是人民生活的根本，寓意人要懂得珍惜這兩種根本需要。廣東人就有以下一個短語：
冇衣食
用以形容不懂珍惜「衣食」；後專門用來形容那些浪費食物的人。
傳統觀念，「冇衣食」帶有「折福」的意味——平時生活習慣放任、不懂珍惜衣食資源，將來會遭到報應——導致陷入「無衣無食」的貧困處境。
示例1：
阿仔，個碗剩返一粒飯都要食埋佢，唔做得「冇衣食」㗎！
一粒咋喎！
冇聽過粒粒皆辛苦咩，舊時啲人話食剩嘢有報應㗎！
廣東人有以下一個講法：
冇啖好食
字面意思是沒有一口好吃的。形容連吃一頓安樂茶飯都不可能；也可引申日子很不好過。
示例2：
打咩仗呀！搞到生靈塗炭，都唔知幾多人「冇啖好食」！
婷婷，做咩「苦瓜乾咁嘅面口」（愁眉苦臉）呀？
近排公司我嗰組換咗個阿頭，佢事無大小都「chur到行」（拉得很緊），跟住佢真係「冇啖好食」！
台灣有以下一句俗諺：
食人，汗流；看人食，瀾流；
予人食，目屎流
食人汗流，食自己目屎流
「食人，汗流」的情況：
人家請客或白吃白喝時，因不需要自己掏錢，所以心情特別興奮、毫無顧忌地拚命大吃大喝，以致滿頭大汗、汗流浹背。
「看人食，瀾流」的情況：
眼巴巴看到別人有東西吃、自己卻沒份兒，只有在旁邊流口水。
「予人食，目屎流」的情況：
到自己請客時，看着別人大快朵頤就會覺得非常心疼，以致掉下淚來。
廣東話的版本是這樣的：
食人食出汗，食自己食出眼淚
這句俗諺對人性中「佔別人便宜就毫不手軟，到自己付錢就斤斤計較」的現實心態極盡諷刺之能事。
示例3：
睇你今日食我食得咁過癮；聽日輪到你，你就知價錢！
「食人食出汗，食自己食出眼淚」，預咗喇！
