【地產箴言】來生定要做物業投資者
湯文亮博士 紀惠集團行政總裁
有朝早上去到茶餐廳，聽到有客人話在周末與一班失意軍人，即是物業投資者食飯，真係唔去好過去，聽班物業投資者係咁呻，不外乎被銀行call loan，將他們的物業變成銀主盤，甚至逼他們賣樓，自住的，自用的都唔放過，物業投資者可能近日Al重生劇睇得多，竟然異口同聲話，若有來生，一定唔會做物業投資者。
老闆問我，若有來生，會唔會考慮繼續做物業投資者，我話唔使考慮，一定會繼續做物業投資者，最驚唔畀我做，既然知道銀行會因物業估值下降而call loan，在樓市高位時賣走手上最差的物業，就算平啲都賣，保持借貸比率在安全水平，否則，如果被銀行逼賣樓，就只能賣走手上最優質的物業，這個道理叫逢三退一，所有投資者都懂，但做到的十中無一，今次甚至是全軍覆沒，以後都唔會有物業投資者，就算有都是那些細眉細眼，炒幾百萬樓仔的人，或者是內地人，新加坡人，今次香港的物業投資者可以話被政府一網打盡。
趁樓價高賣走所有物業
有物業投資者唉聲嘆氣同我講，若有來生，一定會趁樓價高的時候賣走手上所有物業，到了所有物業投資者都唔掂，甚至發誓若有來生，不再做物業投資者的時候，就慢慢收購他們的優質物業，到那時侯，想唔做地產界一哥都唔得，不過，大前提都是要若有來生，如果冇來生，所有的念頭都是空想，前輩唔記得有今生，冇來世這句說話。
講開又講，有日晚飯後，老婆問我赤柱偷工減料豪宅單嘢，買家以及發展商都是輸家，究竟邊個大鑊啲，老實說，兩者都是輸家，都咁大鑊，買家是無妄之災，真金白銀買到一個偷工減料豪宅，喊都喊唔出，當然有人話，如果發展商原銀奉還，咁樣咪冇輸，其實不一定，豪宅升了不少，收番原價都可能買唔到相若豪宅。至於發展商當然是輸家，老實說，我未聽過豪宅偷工減料，豪宅建築費佔樓價的百分比不大，何況偷都唔偷得幾多，點解要偷工減料，只是發展商用錯建築商而已。
