陳家樂圓夢出新歌 連詩雅感動衝上台
陳家樂（Carlos）在2003年參加「全球華人新秀歌唱大賽」後正式入行，過去20多年來都以演戲為主。時隔23年，家樂終於圓了歌手夢，早前舉行首支個人單曲《我們都是無名氏》新歌發布會，首度公開演唱新歌兼首播MV。不少圈中好友包括洪卓立（Ken）、許靖韻（Angela）、楊天宇（Angus）、周志文、張文傑等都前來撐場。當晚家樂緊張到流鼻水，要問台下觀眾拿紙巾抹！不過全晚最Sweet，一定是太太連詩雅（Shiga）全程心心眼撐場，最後更感動落淚。
發布會上，家樂先後演唱鄭伊健的《心照》、張國榮的《拒絕再玩》、陳奕迅的《孤獨探戈》以及自己的新歌《我們都是無名氏》，還特別演唱太太Shiga的代表作《只要和你在一起》。家樂一上台就大嗌緊張，「估唔到緊張過行任何一個紅地氈」。擔任MC的李靖筠（Gladys）問到大家知不知道家樂是新秀入行，台下的陳太Shiga即刻大叫：「我知！」十分搞笑。家樂笑說：「洪卓立都係我之後㗎咋！」全場隨即大笑。
新歌於今日（5日）推出，Gladys落力宣傳，本想叫大家到時可於各大平台收聽，不過她誤將「平台」說成「平房」，家樂即搞笑接上，「平房，係呀，或者藥房都可以聽到嘅。」弄得全場大笑，同時亦為家樂緩和緊張心情。到最後一首歌時，Gladys表示這是最Sweet的環節，家樂先笑說原本只唱四首，「因為我都頂唔到太多啦，哈哈。」
與Shiga合唱定情曲
家樂表示，難得有這個機會，除了要「表示」一下，而且更要「覆桌」，「唔做又對唔住某個人，最緊要就係多謝我老婆啦！」兩人在2023年舉行婚禮時，家樂曾於婚禮上深情向Shiga獻唱《只要和你在一起》，當時他更一度感動得哽咽無法繼續唱下去，「炒車」片段更洗版，所以這晚一定要唱。當天家樂於台上再次唱出這首定情曲時，Shiga在台下一邊跟着唱一邊哭。之後家樂請她上台，Shiga衝上台即攬實老公，兩人合唱兼放閃。
家樂直言今次是人生最緊張的一次，開Show前似作病、感覺全身無力，「好緊張，即使陳太係咁講說話令我放鬆，但我完全入唔到耳！」他指自己剛到場時更是手腳冰冷，上台後雖然仍然緊張，但感覺變得神奇，「我都唔知自己個演出會點，都上到嚟，The Show Must Go On！」他笑言給自己的表現打50分合格。
多謝洪卓立給予演出貼士
他特別多謝太太Shiga與好友Ken，「Show前陳太都有不斷幫我紓壓，令到我冇咁緊張，講咗佢好多舞台嘅經驗，希望我可以上台前有啲咩準備。」Shiga全程在台下默默支持，的確是家樂最大的定心丸。而阿Ken更專程在家樂綵排時到場給予演出貼士，「阿Ken好幫忙，前日佢專登去咗我綵排嘅地方，畀好多Tips我，我邊啲位或者發聲位要再畀啲力，因為可能以前唱歌嘅習慣未係好改到，佢即時就話到畀我聽咁樣唔係咁好，幫我調整。」
望大家透過音樂認識他
談及樂壇頒獎禮，家樂即耍手擰頭坦言太遙遠，不敢去想，反而希望更多人透過音樂認識他。家樂事後在社交平台分享感言，坦言自己從未想過會舉辦迷你音樂會，並邀請眾多音樂界的新朋友到場。他感性表示：「我居然做咗呢件事，諗都冇諗過會搞一個mini show，唱幾首歌，請咗好多音樂界嘅新朋友嚟，最重要係我終於可以同人講，我嘅第一首個人單曲《我們都是無名氏》終於出啦﹗好多謝今日嚟支持嘅所有人，繼續走總相見。」
