【地產箴言】銀主盤突然增加的理由
湯文亮博士 紀惠集團行政總裁
有老友話今次大件事，樓市本來朝着上升的方向前進，一切數字都利好，例如負資產，新樓庫存，以及潛在供應量都大幅減少，唯獨是銀主盤數量回升至454伙，比今年4月份低位高了25%，老友擔心，銀主盤回升，是否樓價下跌先兆，因為銀主賣樓，只求就手，不會忍手，就算低過市價都唔緊要，最緊要是可收番晒所有貸款，就算撇多少賬都冇問題，債仔是有簽私人擔保。
老友不是行內人，唔會理解到樓市轉好，銀主盤才會增加，因為樓市未活躍之前，對於那些資產價格低過貸款金額（即所謂負資產），而又不合借貸比率，就算追唔到差額，只要業主按時供樓，唔會躺平，銀行是不會沒收債仔物業，不過，債仔就要付出較高昂利息，老實說，大多數債仔都會接受，並且對銀行千多萬謝。
老友可能唔知道，銀行對於客戶未能依期補差額的物業，一向都採取按兵不動態度，但現在睇到樓市活躍起來，就會打算賣走那些追唔到差額的物業，不過，要賣走那些物業，首先要沒收那些物業，將物業變成銀主盤，否則，銀行是冇權賣走債仔物業，與此同時，客戶見物業變成銀主盤，如果由銀行賣，可能隨時賣平兩三成，倒不如自己加多啲佣金，希望可以由自己手中賣走，即使要輸，都唔好輸咁多，估計在未來一段時間，物業成交量會增加，成交價未必會上升，就算量升價跌，都是樓市向好的表現。
可能是樓市向好先兆
如果銀行以銀主身份賣那些物業，很多時都會叫自己的客戶買番，正是肥水不流別人田，銀行不但可以保持貸款，而且風險下降很多，所以，銀主盤突然增加，極有可能是樓市向好的先兆，最低限度銀行願意借錢畀人買樓。
