《女神配對計劃2》全新賽制 女神閨蜜陣容大曝光
香港文匯報訊（記者 梁靜儀） 由「金牌媒人」林盛斌（Bob）主持的 TVB 戀愛真人騷《女神配對計劃 2》，本周日（13 日）播映的第二集，五大女神何沛珈（Roxanne）、阮嘉敏（Mandy）、陳若思（Amber）、俞可程（Kanis）及郭珮文（Juliana），將撳燈挑選心水求愛勇者！今屆求愛勇者入圍標準有兩個，第一是得到三位或以上女神撳燈仔支持，第二是自己心儀的女神有份撳燈挑選自己，換言之，即使只有一位女神撳燈，該名求愛勇者依然有望入圍。
而第二集女神將曝光「閨蜜花生團」成員，Roxanne 的閨蜜是游嘉欣（游游）、Mandy 的閨蜜是鄧依婷、Amber 的閨蜜是「高成彬」劉倬昕（Sam）、Juliana 的閨蜜是「東張小花」鄧凱文、Kanis 的閨蜜是其親家姐，Kanis 家姐驚揭 Kanis 是「容易受傷的女人」：「見到佢每次分手都好受傷害，所以今日特登嚟決心幫佢搵一個好男人。」
當中爆得最爽的是「高成彬」Sam，她更搞笑公開 Amber 的海量擇偶條件：「佢鍾意高嘅、叻嘅、脾氣好、皮膚白、眼大、唔肥、斯文、怕醜，最緊要係天秤座！」至於游游，則半搞笑半認真指 Roxanne 鍾意「搵年紀大」，並在爆料期間再度展現她的招牌論盡：「我覺得佢應該適合五歲以上」，阿 Bob 聞言即更正為「大五歲以上」。至於阿 Juliana，則被鄧凱文及阿 Bob 踢爆好鍾意食嘢，其中阿 Bob 的「指證」最搞笑：「我哋拜完神好多燒肉，佢食咗半盒呀！佢真係好鍾意食嘢。」
有求愛勇者坦承有過一夜情
今集第一位登場的，是以健碩身形、擁 41吋胸肌、成功人士外表及搞笑「龍舟論」引發關注的關經翰（Oswald）！由於 Oswald 於海選面試期間，曾坦承自己有一夜情經驗，隨即引發 5 位女神關注，Kanis 大膽追問：「你試過 One Night Stand（一夜情）？」Amber 聞言認介意：「我覺得係觀念問題，有一次就會有好多次。」Mandy：「我比較介意衞生同佢冇做安全措施多啲。」
Kanis：「One Night Stand 喺我心目中有少少扣分」，之後更追問 Oswald：「如果伴侶介意，點畀返信心？」，當 Oswald 說畢後，花生團阿 Sam 即激動吐槽：「呢個價值觀全錯！」至於 Roxanne，則獲游游肉緊致電教路：「我覺得你揀咗先，雖然佢 One Night Stand，但我覺得佢個人都成熟穩重，我覺得不妨了解一下。」
