側田萬聖節開騷 吹住海風勁Chill
側田宣布將於10月30日及31日，在西九文化區安盛竹翠公園舉行兩場戶外音樂會「側田 2026《再一起 COME TOGETHER》— 萬聖節香港站」。這是繼2022年後，相隔4年再度在港舉行個人演唱會。
近年長居泰國的側田直言期待又緊張：「好耐冇見香港嘅歌迷，今次真係好期待，心情有啲緊張，但係更多係興奮。」特意選址戶外，鄰近維港海濱，側田希望嘗試不同感覺：「喺海邊吹住風唱歌，望住成個維港景，成件事好Chill、又有氣氛，係兩個完全唔同嘅feel。」他強調今次演出為香港獨家，會將所有心思放在細節上，確保演出質素。
適逢演出正值萬聖節，側田呼籲觀眾踴躍扮裝入場，將現場變成Halloween party。他預告歌單是樂迷耳熟能詳的「田式情歌」為主，勢必勾起樂迷集體回憶。今次每一位觀眾可憑演唱會門票換領一杯酒精或非酒精飲品，大會期待大家同側田一齊high住過Halloween！
