《中聲4》蒙面唱將下月開唱 寧犧牲睡眠備戰盼回饋歌迷
曾以蒙面身份及動物造型參與《中年好聲音4》的藝人，包括「企鵝人」周志康、「獅子王」羅天宇、「貓女郎」劉佩玥、「白羊君」姚兵、「白眉鷹王」莫家淦，以及「樹熊公子」黃建東，將於下月30日合作演出《愛爆動物音樂秀》，優先訂票已全部售罄，門票於今日正式公開發售。6位蒙面歌手為音樂會全力以赴，即使工作繁忙也願意犧牲睡眠，只求呈現最佳演出。 ●香港文匯報記者 子棠
6位蒙面歌手皆對這個音樂會相當期待，縱使有其他工作在身，也寧願犧牲睡眠時間，要把今次演出做到最好，務求讓大家能為他們在音樂會中所付出的每一分力而感動。
周志康表示，非常開心經歷了近一年的比賽，終於可再跟粉絲見面：「今個音樂會動物歌手陣容，令我諗返起當初大家參加呢個比賽嘅第一日，大家戰戰兢兢好畀心機去練歌，各自為自己嘅舞台努力。其他5位都係自己嘅好朋友，大家今次共同努力，有另一種意義。我希望唱多啲好歌畀大家聽，回饋呢段時間一直支持我嘅歌迷。」
羅天宇好開心有一個屬於他們「動物歌手」的機會：「比賽過程中，我哋基本上係冇以一個組合形式去代表動物歌手唱歌，所以真係好期待可以一齊大合唱。另外，如果唔係公司畀咗我哋參加《中聲4》嘅機會，我相信自己都冇機會可以成為呢個音樂會嘅其中一分子，再加上自己喺24強止步，一直都希望可以有更多機會再去唱歌畀大家聽，所以自己好珍惜音樂會所參與嘅每一部分。」
莫家淦堅持走音樂路
劉佩玥感謝大家一直以來對她的支持和鼓勵：「好感恩由大家喺我參演嘅劇集角色中認識我，到今次可以喺《中聲4》嘅舞台上再發現我唔同嘅一面。雖然比賽已經結束，但因為我好熱愛音樂，好鍾意唱歌，所以一直都繼續好努力咁去練歌同練琴，亦有學習音樂創作，當然唔少得一直要keep住身心嘅健康狀態、做運動無得臨急抱佛腳，要好自律同持之以恒，所以現在都keep住鍛煉自己，唔只為咗上台表演着衫好睇，而係將好嘅狀態一直keep住，咁就做咩都會更得心應手。」
姚兵興奮地說：「可以開音樂會係對我今次參加《中聲4》嘅一個肯定，我覺得呢個音樂會好特別，用動物園嘅概念同身份嚟參加，我記得上一次喺我身上有啲熱度出現就係《星夢傳奇》，但都已經係十幾年前嘅事，所以今次有呢個機會真係好開心和期待。」
莫家淦表示自入行以來，一直渴望能夠得到更多唱歌的機會：「衷心多謝《中聲4》給予我一個專屬歌唱嘅舞台，每個周日可以企喺台上唱歌，已經係好大嘅福氣，令我更驚喜開心嘅係後續仲有一場《愛爆動物音樂秀》。雖然我喺《中聲4》止步淘汰，但追夢之路唔會停低，往後我會繼續堅持，做屬於自己人生嘅主角。」黃建東說：「其實由細到大都有彈琴同寫歌，音樂一直都係我嘅夢想，諗唔到因為參加《中聲4》有機會參加呢個音樂會，希望到時彈琴唱歌，令觀眾認識一個不一樣嘅黃建東。」
