【粵語講呢啲】賣魚佬，有聲氣；唔食羊肉一身騷；騷騷都係羊肉
●梁振輝 香港資深出版人
「腥」，文讀「星/sing1」、白讀「seng1」，指氣味刺鼻難聞；如：腥臭，腥氣/腥味/魚腥味。
廣東人叫魚販做「賣魚佬」，由於長期接觸魚類，因此會一身「腥氣」。「腥氣」取其諧音「聲氣」。「有聲氣」有正面回應或有下文的意思，也暗喻了有很大機會成事。就此，廣東人創作了以下一個歇後語：
賣魚佬——有聲氣
又只要「賣魚佬」去洗個澡（沖涼）便可把腥氣去除，所以也有以下一個歇後語：
賣魚佬沖涼——冇晒聲氣/冇聲冇氣
示例1：
A：上個禮拜你見嗰份工見成點？
B：「賣魚佬沖涼」，冇聲冇氣囉！
A：咁你「追」（追求）妹頭嗰單嘢呢？
B：佢冇正面回應，不過佢個老best（閨蜜）靜雞雞同我講，話妹頭話對我印象幾好喎！
A：咁咪「賣魚佬」，有聲氣囉！
「騷」指腥臭，如：羊騷。「膻」，讀「騷」，同「羶」，指羊身上的腥臭味。「膻」有異體作「羴」。「騷/膻」是最常見的寫法。
書面語中有這樣的諺語：
不吃羊肉空惹一身膻
羊肉不曾喫，空惹一身膻
廣東人會這麼說：
唔食羊肉一身騷
意思是羊肉沒吃上，反倒沾了一身羊騷氣。比喻未曾參與其事或尚未撈到好處，已備受牽連、惹來了麻煩或壞了名聲。
示例2：
佢費盡心思去追求個新嚟嘅女同事；追唔到不特止，最慘係畀條女響社交平台度「唱」（冷嘲熱諷），仲唔係「唔食羊肉一身騷」！
與「羊肉」有關的諺語還有以下一個：
騷騷都係羊肉/騷一騷都係羊肉
羊肉雖然聞起來騷騷的，但畢竟是不常可吃到的肉類。比喻雖然東西不夠完美或有些缺點，但還是有點價值的，總比完全沒有的好；也用來形容所得報酬或利益雖然未盡人意，但總比一無所有好，相當於：
好過冇（好過沒有）
這個諺語通常帶有無奈地接受或將就的心態。
示例3：
老闆：今年公司嘅業績大家有眼睇，差成咁我都唔諗過炒人！年終勤工獎就冇得派嘞，不過大家就放多一個禮拜假！
某員工心想：「騷騷都係羊肉」，好過乜都冇！
話說回來，筆者認為「騷騷都係羊肉」乃演化自以下一句：
衰衰都係羊肉
「衰衰」是「騷騷」的諧音，又羊肉相對比其他肉類，如豬肉、牛肉矜貴。所以就算質素差一點，其在人們心目中的地位仍是高一點。
示例4：
喺公司，我哋成班友除咗阿輝讀過大學，全部都係中學畢業；冇錯，佢做嘢唔係醒過人，不過「騷騷都係羊肉」，有乜嘢要同公司fight（爭取），我哋都「隊」（推）阿輝出嚟做代表㗎！
「假假地」（好好歹歹）佢都係個大學生！
