演捉姦戲為求逼真 高Ling真打郭柏妍
談擇偶條件 抗拒跟圈中人拍拖
熱播劇《夫妻的博弈》主演高海寧（高Ling）、馬國明（馬明）、郭柏妍、何廣沛與鄧智堅，日前接受TVB節目《一周星星》訪問時，高Ling自爆一場捉姦戲拍到「冇咗半條人命」，更因太投入角色，出盡全力真打郭柏妍。高Ling還大談擇偶條件，指雖然公司有很多好男人，但就不想跟行內人拍拖。
高Ling在節目中透露，於《夫妻的博弈》飾演的角色姜幸如，有一場極為關鍵的轉折戲。劇情講述她發現最愛的男人（張頴康飾）與最友好的閨蜜（郭柏妍飾）竟然在床上出軌，對她造成毀滅性打擊。高Ling坦言拍攝時非常投入，形容那種被雙重背叛的感覺是極度痛苦的事，更要被侮辱「你都就嚟死啦」等惡毒言語。
為了讓演出更逼真，高Ling坦承當時完全豁出去，對郭柏妍的動作戲更是冇留力，「所以嗰場戲好真情實感去做，中間有一 Part 我要打你（郭柏妍）個頭，我係冇留力㗎，因為真係好傷心呀，傷心到嗰下所有情緒爆發出嚟。」被打的郭柏妍則表示，當時自己也完全沉浸在角色的痛苦中，情緒非常激動，所以根本沒有留意到被打的力度，「我已經唔記得嗰一吓畀人打得好勁。」兩位演員的專業精神展露無遺。
洪永城自爆曾做媒人
節目中，高Ling還大談擇偶條件，但拒絕跟行內人拍拖：「原因係我好想喺工作之餘嘅時間，想做返一個平常人。」此時節目突然播出洪永城預先錄下的片段，他自爆曾做媒人，推薦了幾個男性朋友給高 Ling：「唔知道依家發展如何呢？好似麻麻哋。」高Ling聽後即睜大雙眼，緊張地澄清：「絕對冇啲咁嘅事！」更稱馬明可以做證人。
另外，先天有聽力問題的何廣沛表示，平時會戴助聽器，但由於拍劇時無法佩戴，若對手站得較遠，他就會聽不到對方說話，「所以我拍戲嗰陣要好專心，唔會玩任何嘢，仲要背埋人哋啲尾句，背晒所有嘢囉。」
