被拍到「藐爆」鍾柔美 姚焯菲解釋是熟人相處方式
香港文匯報訊（記者 梁靜儀）姚焯菲（Chantel）與葉振弘（Marco）昨日出席活動。談到Chantel早前與詹天文及鍾柔美（Yumi）出席活動受訪時，被指「藐爆」Yumi，她笑言：「其實好搞笑，因為我喺個App上面睇到先，我睇嗰時係得幾個like，我冇理到，我覺得唔需要即時解釋，因為我覺得呢個係我哋平時生活溝通嘅一種方式，但都知應該會出事。幾個鐘後朋友傳給我，見到多咗咁多個like，我要澄清一下，呢個就係我哋三個溝通方式，越熟就有呢啲情況發生。」她承認自己有不對：「我唔應該喺鏡頭前擺呢個樣出嚟，因為會惹起好多誤會，多人嘅時候唔好咁做，同埋我發現我個樣都真係幾惡，我都要調整呢樣嘢，喺Yumi同Windy（詹天文）面前都唔應該咁樣。」
Chantel又稱私下也有將報道傳給二人睇，因知道不是真，所以都會拿來開玩笑，所以一定不會影響彼此感情。對於被指是「變臉高手」？Chantel就笑說：「咁大家要搵我拍戲喇。」
Chantel原定於本月8日跟Yumi及詹天文在中山舉行的演唱會，現要延期演出，她坦言不清楚原因。問她會否因此多了時間綵排於本月底於麥花臣舉行的個唱？她坦言還未開始排練：「其實我仲未開始排舞，跳舞有一兩part，我都有啲擔心進度，但對自己有信心，都唔係第一次呢個情況，之前試過都搞得掂。」至於為何如此遲還未開始排練，她就稱要問公司，而之前她去了加拿大做騷，回港後又有其他工作，包括出席籃球賽同幾個商演，她都有同公司反映過。說到她今個暑假工作不斷，是否大豐收？她笑說未有時間去計，酬勞會交由媽媽處理。
