男童巴士「釣魚」瞓過界 鄰座男輕托任挨超暖心
網上近日廣傳一段巴士上的暖心故事。有女乘客直擊年幼男童因倦極在「舂眼瞓」，不自覺地挨在鄰座陌生男子身上，鄰座男非但沒嫌棄，還遞手示意男童母親不用過來叫醒兒子，讓男童得以「瞓咗半程車」，大讚「成件事好有愛」。帖文單日吸逾44萬次瀏覽，網民無不對這好人好事讚不絕口，誇讚「好男人」、「大暖男」，又爭相分享類似經歷，證明香港人並非冷漠，「其實好多人默默做緊溫暖嘢，睇到好感動」。
樓主前日在Threads發帖兼Po兩張相，直擊一段「真男人」的美事，提到「小朋友舂眼瞓挨咗落個男人度，起初個小朋友嘅媽媽都怕麻煩到人，想整番醒個小朋友，之後個男人遞手示意唔緊要畀佢瞓（仲幫小朋友扶住個頭驚佢跌）」如是者男童安心瞓足半程車，而鄰座男因擔心男童母親不好意思，最後與對方調位，讓母子可坐在一起。其中一張相片可見，鄰座男屈起右手形成「人肉頭枕」供男童安心依傍，另一張相則顯示右手垂下，男童順勢挨着安睡。
大批網民留言派like：「好人有好報」、「真係好有愛嘅畫面，個男人暖男到呢！」，不少人更坦言：「終於見到關於巴士嘅暖心故事，唔係伸手非禮前座女學生、除鞋剪腳甲、隻腳連鞋晾喺對面張凳…」「上Threads就係為咗睇呢啲」。
多位網民更憶起自身經歷並分享道：「我小朋友都試過，姨姨攬住佢瞓大髀，勁好人」、「我女細個都試過，個叔叔俾佢挨足全程。仲好留意佢有無向前」，亦有人曾當上「鄰座男」的角色，「我試過俾人挨住瞓N次。莫講話小朋友，包括大人」，有過來人就伺機道謝：「我細個都有試過啊！我要多謝世界上畀過小朋友挨過嘅所有叔叔姨姨哥哥姐姐公公婆婆」，獲樓主和應說「衷心祝福佢哋開開心心，幸福快樂過生活」。
