【粵語講呢啲】食咗乜、食咗物、食咗乜乜物物（三）
●梁振輝 香港資深出版人
象棋中，「車」（讀「居」）是攻擊力最強、行動最自由的棋子。如果對局時「車」被對手吃掉就相當於失去了最核心的王牌，令元氣大傷。就此，廣東人會用「食咗人隻車」來比喻侵佔了別人極大的利益、對人要求苛刻，或者貪得無厭致令對方付上沉重的代價。
示例1：
開講有話，新嚟新豬肉，實行屈嗰條新仔（新同事）請我哋成組人去high tea。
佢係trainee嚟咋，咁即係「食咗人隻車」啫！
呢個主題公園一罐汽水就賣80蚊，酒店咁嘅價錢，想「食咗人隻車」咩？
在任何一個年代，社會上都存在不少人為人家做了點事，卻因不甘心而在事後說出些尖酸刻薄的說話；對方當然不是味兒，有些人會用以下不忿的話語作回應：
食咗（都）唔落膈（格）！
食咗（都）打背脊骨落！
這裏的「食咗」非指吃了什麼東西，而是指接受了對方少許好處或恩惠。
「膈」指橫膈膜；由於音同「格」，且含架子的分層之意，不少人誤把「膈」作「格」了。然而在溝通的層面上，寫作「格」是可以接受的。「食咗唔落膈」的表面意思是胸膈阻塞令吞嚥不順，可借喻吃不到、無法承受、支持不住或難以忍耐。
示例2：
乖孫，件豬扒咬多幾啖至好吞！
知喇，「食咗唔落格」吖嘛！
「背脊骨」是脊椎的俗稱，在食道隔鄰；「食咗應打食道落」卻「打咗背脊骨落」，這相當於「食咗唔落格」。
就「食咗打背脊骨落」此一俗語，坊間有兩個流行的寫法：
食咗背脊骨落；食咗都背脊骨落
表面看來，這兩個是「食咗打背脊骨落」的異體，差異只在一個「打」字。查「打」有沿着、順着的意思；雖明其意，但不合文法。
示例3：
上個禮拜響個舊同學聚會度見返多年冇見嘅一個同學仔。佢一開口就晒佢而家有幾威，賺到幾多錢，跟住就好豪氣咁話呢餐佢嘅，叫大家唔使客氣；咁就真係爽到痹喇！後來講開佢知我而家孤家寡人住公屋，就噏咗句：
諗你都係我哋班同學之中最兜踎（落魄）嗰個嘞！我當時冇反面，不過就心諗：
食咗唔落格/食咗打背脊骨落
講真，你都係順便幫咗我個忙啫，使唔使見嚫人就講點幫我點幫我呀，我當你做再生父母好唔好，真係「食咗都唔落格/食咗都打背脊骨落」，頂你唔順呀！
