新帥期待獻技 踢好波答謝球迷
車路士抵港 備戰祖記
「香港足球盛會2026」精彩比賽一浪接一浪，車路士及祖雲達斯將於本月5日（星期三）在啟德主場館交手。車路士新帥沙比阿朗素表示期待領軍來港獻技，並視今場與祖雲達斯的友誼賽為新球季最佳備戰，務求以精彩演出答謝球迷。
車路士新球季換上沙比阿朗素執教，球隊完成了澳洲集訓之旅，然後昨晚抵達香港準備參加周三之戰。沙比以往曾經為另一英超球會利物浦上陣，今季改以車路士領隊的嶄新身份回歸，他說自己非常期待今次香港之旅，認為是與球迷交流的好機會：「車路士能夠嚟香港同球迷互動，將會係寶貴經歷。無論我哋去到邊，都會感受到球迷對於車路士嘅支持同熱情，好感激亞洲球迷經常捱夜到凌晨睇我哋比賽。」
沙比阿朗素說另一個重點是和祖雲達斯交手，為新一季英超備戰：「期待喺啟德主場館同祖雲達斯交手，季前賽係每支球隊新球季開始前嘅最後備戰，我哋想同祖記踢一場精彩比賽，答謝球迷支持。」
沙比新官上任，陣中球員都要借季前集訓的機會展示實力，務求在新一季爭取更多上陣機會。20歲的車路士荷蘭籍守將祖列爾哈圖表示：「今次季前集訓係好好嘅團隊建立活動，大家嚟到悉尼同香港，適應新領隊沙比嘅要求。佢嘅戰術同踢法都好聰明，大家都想喺集訓過程中向新領隊展示最好一面。」
祖列爾哈圖讚啟德設施
祖列爾哈圖從未來過香港，除了想探索香港飲食及風景之外，他說最重要仍然是落場比賽：「啟德主場館設施一流，球員喺良好場館內比賽會更有動力，自己亦期待喺5萬球迷打氣下踢一場精彩比賽。我都聽過香港嘅車路士球迷好熱情，期待喺佢哋面前獻技。」
今年夏天，祖列爾哈圖首度代表荷蘭踢世界盃決賽周，在32強互射12碼不敵摩洛哥出局。祖列爾哈圖回憶說：「世界盃嘅氣氛好瘋狂，雖然輸波嘅感覺好奇怪，但自己以20歲年齡可以踢到決賽周，已經係一件值得驕傲嘅事。」
問及新球季哪一支英超球隊有能力爭奪聯賽錦標，祖列爾哈圖說：「我唔會理其他球隊情況，最重要係集中喺車路士身上。我哋有好嘅陣容，好好嘅領隊，新一季係時候展示車路士嘅潛力。」
