陳卓賢啟德開個唱 被馮允謙當眾「驗身」
香港文匯報訊（記者 子棠）MIRROR成員陳卓賢（Ian）近日於啟德體藝館舉行《IAN CHAN：GROWTH LIVE 2026》演唱會，前晚的一場請來創作歌手馮允謙（Jay Fung）擔任嘉賓。
Ian在演唱《Me and the Moon》期間，原唱者Jay Fung驚喜現身合唱。唱畢，Jay笑謂日前在社交平台看到一條片，片中Ian身形fit到似AI生成；Ian即大方挺胸說：「你摸吓！」Jay Fung識做先問準台下的粉絲，引來全場尖叫起哄，然後他鬼馬問Ian：「咁可唔可以周圍摸？」Ian配合氣氛扮得一臉警戒反問：「你想摸邊度先？講清楚呀，我呢啲守身如玉㗎！」Jay隨即承諾會「好斯文」地驗貨，一手由胸肌掃落腹肌，邊摸邊「嘩！嘩！」聲大叫：「真係好結實，好堅！」平日有操肌的Ian透露為個唱特別密集式操練了一個半月。
其實Jay早在兩年前邀Ian任個唱嘉賓時，已曾「驗身」一次，可算是「見一次摸一次」。被摸完的Ian今次就要求摸對方，嚇得Jay即時縮起身體，急說：「下次你做我表演嘉賓時，先畀你摸。」二人更即場勾手指尾兼打手印做約定。Jay又指5年前與Ian合作音樂會時，二人都屬內向派，不擅長搞氣氛及說話，但眼見Ian現在開足9場演唱會，真心為對方驕傲。Ian就笑言，以後彼此的大Show都要互相做嘉賓；Jay謂：「當然想，但你咁忙。」Ian未待Jay講完已搶說一定為對方預留檔期，但又抵死地用英文拼音語氣笑說：「不過你可唔可以將字幕加返少少中文字，我睇唔多明你啲拼音呀！」逗得全場爆笑。
