【粵語講呢啲】食咗乜、食咗物、食咗乜乜物物（二）
●梁振輝 香港資深出版人
假使有人「姿態悠閒」地出現在你跟前，你會感受到他是何等的從容、何等的自在，應沒有事情可令他擔憂的了。廣東人會叫這副模樣做「姿悠」，多寫成其同音詞「滋油」。以下是一些與此詞意思相仿的用詞：
滋滋油油、滋油淡定
食咗幾擔豬油/食咗成擔豬油
食咗豬油包
「滋滋油油」是「滋油」的加強版。「滋油」與有冷靜鎮定意思的「淡定」同義，「滋油淡定」便成了「滋油」的強化詞。「豬油」是「滋油」的諧音；「食咗幾擔豬油/食咗成擔豬油」其實是「食咗幾啖（幾口）豬油/食咗成啖（整口）豬油」。豬油多吃會膩，膩了就不能再吃下去，所以用「食咗幾擔豬油」來諷刺人過度「滋油」，做事總是慢吞吞的/慢半拍的便最適合不過。製作「豬油包」用「豬油」，所以「食咗豬油包」成了「食咗幾擔豬油」的一個趣味版本。
示例1：
我呢個拍檔講嘢陰聲細氣、做嘢慢條斯理，要提佢幾嘢先郁一郁，「食咗幾擔豬油」咁！
中醫師指出吃山楂麥芽可幫助消化。「食咗山楂麥芽」就是說某人的胃口出奇地好。
示例2：
你唔係呀嘛，叫兩個巨無霸餐，「食咗山楂麥芽」咩？
有兩個friend嚟緊呀，叫定先啫！
吃了大蒜，口中會散發出一股難聞的氣味。廣東人就此創作了以下一個歇後語：
食咗大蒜——大口氣
比喻大言不慚。
示例3：
今屆世界盃日本喺32強未對巴西之前，有位隊員話巴西今非昔比，球星尼馬已經冇以前咁有威脅，分分鐘隊冧巴西都唔出奇。呢條友真係「大口氣」，「食咗大蒜」定嘞！
坊間有兩個與「食咗好多大蒜」相關的俗語：
食咗幾擔大蒜，食咗成擔大蒜
寫法應來自「食咗幾擔豬油」；可會知道，只要吃過少量大蒜已有「大口氣」的效果，所以不需要用上這麼誇張的描述。
中國人迷信以形補形，如：吃豬心補心、吃豬腰補腎。豹子性強悍兇猛，所以如有人極有膽量、簡直不顧後果或大膽至接近瘋狂程度，廣東人會說他：
食咗豹子膽
示例4：
你「食咗豹子膽」呀，居然連老細都咁「寸」（譏諷、以下犯上）！
日本呢個森林一帶貼咗好多「熊出沒」嘅告示。不過就好多人唔識死照走入去，話過往十幾年都冇事發生，冇有怕。唔通佢哋「食咗豹子膽」？呢個世界唔怕一萬，至怕萬一！
「草龍」（「龍」口語「隴/龍4-2」），蜥蜴科「石龍子」的俗稱，是一種肉食性動物。其主要食糧是昆蟲，如：蝗蟲、蟋蟀、毛蟲。
養雀多數以「雀粟」作飼料；一般認為吃「素」淡而無味，所以雀兒唱歌也提不起勁；如果主人久不久以食肉的「草龍」作餵飼食糧，牠就會萬分雀躍，歌唱得頻密且嘹亮。
說人「好唱口」，不一定是他不停地唱歌；只不過是因心情特別好而說多幾句話，甚至哼歌幾句。廣東人就此創作了以下一個歇後語：
食咗草龍——好唱口
用以形容某人因心情開朗而說話特別多，就像雀兒吃了「草龍」般唱個不停。
