馮素波難忘「孫仔」害羞 吳諾弘有意加入樂壇
香港文匯報訊（記者 阿祖）由洪天明、陳柏宇（Jason）、劉沛蘅（Hillary）及黃妍（Cath）主持的《嫲嫲飯飯》於HOY熱播當中，節目邀來不同的星級嫲嫲亮相，包括有「大眾嫲嫲」之稱的馮素波（波姐），還有她的「哎呀孫仔」香港男子花劍隊代表吳諾弘（Lawrence）。
Lawrence小時候已經和波姐合作過，波姐還記憶猶新：「當時佢好安靜㗎，到佢講對白嘅時候，佢又唔出聲，以為佢驚啦，以為佢好沙塵啦，綵排嘅時候咩都唔講，點知道正式嘅時候佢又講㗎喎，原來係怕醜，呢個就係佢嘅特色喇！」
今次有機會再跟波姐拍節目食飯，Lawrence都覺得好開心，他還笑說要開個群組，找回當日和波姐合作過的童星，一起吃餐飯敘舊！而講到他的隊友蔡俊彥正式加入樂壇，Lawrence坦言都有想過：「我覺得我自己都有可能有呢方面嘅打算，但係點都要等到退役之後，不過都係順其自然，因為娛樂圈都好講求實力同埋運氣，都係要好好裝備自己先！」
主持之一的陳柏宇笑言一講起女兒就變眼淺：「如果講咗一啲特別嘅話題關於囡囡嘅，例如如果講到佢哋會死亡嘅話，我只係幻想都即刻會喊！」嘉賓主持Cath雖然和Hillary第一次合作，不過她們一見如故。Cath表示拍攝得非常開心：「我好鍾意聽人分享，今次仲有美食，可以食到嫲嫲嘅美食係開心嘅！而我同婆婆就比較親啲，佢未離開嘅時候，已經患上失智症，同佢傾偈嘅時候，佢好似活喺佢自己嘅時空裏面，好多時都溝通唔到，狀態就好似我哋浸喺海底，我哋好努力咁樣同對方講嘢，但係都溝通唔到！所以幾年前我寫咗首歌《無聲浪》，當時感覺都會難受嘅，我要鼓起勇氣先至敢問佢，記唔記得我係邊個！」
